Առուշ Առուշանյանի հետ՝ հանուն անվտանգ, միասնական, շենացող համայնքի-այս կարգախոսով Առուշ Առուշանյան դաշինքը մասնակցում է Գորիս համայնքի ավագանու ընտրություններին
Շարունակվում է հոկտեմբերի 17-ին Սյունիքի Գորիս, Տեղ, Տաթև համայնքներում կայանալիք Տեղական ինքնակառավարման մարմինների ընտրությունների թեկնածուների քարոզարշավը։
Քարոզարշավի շրջանակներում հրապարակվել է Գորիս համայնքի ընտրություններին մասնակցող դաշինքի նախընտրական ծրագիրը և թեկնածուների ցուցակը գլխավորող Առուշ Առուշանյանի ուղերձն իր հայրենակիցներին։
Նախընտրական ծրագրի հիմքում, ըստ դաշինքի, դրված է անվտանգ, արդար, զարգացող համայնք ունենալու տեսլականը։
Նախընտրական ծրագրում ներկայացվել է նախընտրական ցուցակի առաջին համարը ներկայացնող թեկնածուի՝ Առուշ Առուշանյանի համայնքային իշխանության ղեկավարի պաշտոնավարման ընթացքում Գորիս քաղաքում և բնակավայրերում իրականացված բարեկարգման, կառուցման, զարգացման ավարտված, ընթացիկ, ինչպես նաև արդեն իսկ պլանավորված և նախագծված ծրագրերը։
Անդրադարձ է կատարվել բազմաբնակավայր այն ծրագրերին, որոնք «ուղղված են համայնքի ռազմավարական, սոցիալական զարգացմանը»։ Առանձնապես շեշտադրվել են այն նախագծերը, որոնք իրականացվում են սահմանամերձ, մասնավորապես, Որոտան, Շուռնուխ, Ներքին Խնձորեսկ բնակավայրերում։
Առանձին բաժիններով ներկայացված են համայնքի քաղաքաշինության, տնտեսության, սոցիալական, զբոսաշրջային, արտաքին կապերին վերաբերող դրույթներ։
Նախընտրական ծրագրի հետ ընտրողներին է ներկայացվել նաև Առուշ Առուշանյանի ուղերձը ընտրողներին, որում նշվում է, որ «Մեր երկիրը գտնվում է բարդ աշխարհաքաղաքական միջավայրում։ Տարածաշրջանային անկայունությունը և անորոշության մարտահրավերները սպառնում են մեր անվտանգությանը»։ Եվ, ըստ թեկնածուի, իրենց դաշինքը «հստակ պատկերացնում է իրականությունը»։ Նա նշում է նաև այն մասին, որ վերջին տարիներին Գորիս համայնքի փոփոխություններն ակնհայտ են, և որ առանց խոստումների, տեղական իշխանությունն իր պաշտոնավարման ընթացքում «վերականգնել է քաղաքի դեմքը, դիմագիծը, կոլորիտը»։
Առուշ Առուշանյանը կարևոր է համարում համայնքի ապագայի տեսլականի գիտակցումը և կամքը՝ «փորձություններն ու խոչընդոտները հաղթահարելու համար» ։
Դաշինքի նախընտրական շտաբի տեղեկությամբ, ծրագրային դրույթները ընտրողների ներկայացնելու համար հանրային միջոցառում չի նախատեսվում։
