«Տեղական ինքնակառավարում հանուն Գորիս համայնքի զարգացման» ծրագրի շրջանակներում Գորիսում կազմակերպվել է համայնքի տեսլականի մշակմանն ուղղված հանրային քննարկում, որտեղ ի թիվս այլ հարցերի, քննարկվել են նաև համայնքի սոցիալական խնդիրները։ Նշվել է, որ բացի անվտանգային հիմնական մարտահրավերներից, համայնքը ներկայումս բախվում է մի շարք սոցիալական խնդիրների, որոնք էական ազդեցություն ունեն համայնքում բնակվող անձանց, հատկապես այն խմբերի կյանքի որակի վրա, որոնք համակարգային անհավասարությունների են բախվում: Այս մարտահրավերները ներառում են նրանց կյանքի տարբեր ոլորտներ՝ կենցաղային պայմաններից մինչև սննդապահովում և առողջապահական աջակցության հասանելիություն։ Հիմնական խնդիրը կապված է համայնքում խոցելի խմբերի համար անհրաժեշտ վայրերի հասանելիության հետ, որոնք նախատեսված լինեն տարբեր սոցիալական խմբերի հատուկ կարիքները բավարարելու համար: Այդ թվում են միայնակ տարեցներ, կյանքի դժվարին իրավիճակում հայտնված տարեցները, տեղահանված անձինք և փախստականները, ընտանեկան բռնության զոհերը, աղքատ (աղքատացող) ընտանիքները և կանայք, ովքեր հաճախ պայքարում են իրենց անհրաժեշտ աջակցությունը ստանալու համար:
Գորիսի բարեգործական ճաշարանը, որն արդեն գործում է շուրջ 32 տարի, սկսել է աշխատել Արցախյան առաջին պատերազմի տարիներին և այցելուների մեծ մասը հենց տեղահանվածներն էին։ Այժմ հիմնական շահառուներն են՝ Գորիս քաղաքի միայնակ տարեցները, հաշմանդամություն ունեցողներն ու խոցելի այլ խմբերի ներկայացուցիչներ, ովքեր օրական մեկ անգամ անվճար սնունդ են ստանում, նաև կենցաղային անհրաժեշտ աջակցություն։ Գորիսի բարեգործական ճաշարանն ունի մոտ 100 շահառու, որոնցից ամենատարեցը՝ 90, իսկ ամենաերիտասարդը՝ 11 տարեկան է։
«Համագործակցության կամար» բարեգործական ՀԿ-ին սննդով աջակցում է ,«Կամրջակ» ՍԲՀԿ-ն, որը սակայն, չունի բավարար միջոցներ նաև տարածքի բարեկարգման, կահավորման համար։
«Գորիսի մամուլի ակումբ» ՀԿ-ն «Տեղական ինքնակառավարում՝ հանուն Գորիս համայնքի զարգացման» շրջանակում Գորիսի բարեգործական ճաշարանին տրամադրել է խոհանոցային կահույք։
«Համագործակցության կամար» բարեգործական ՀԿ-ի թիմն այժմ նաև ֆոնդահայթայթում է իրականացնում, որպեսզի ներգրավեն բուժաշխատողների, սննդաբանի, հոգեբանի՝ խոցելի խմբերի սոցիալ-հոգեբանական, առաջին բուժօգնության աջակցություն տրամադրելու համար։
Ծրագիրն իրականացվում է «Գորիսի մամուլի ակումբ» ՀԿ-ի (ԳՄԱ) կողﬕց՝ Եվրասիա համագործակցություն հիﬓադրաﬕ (ԵՀՀ) հետ, Աﬔրիկայի ժողովրդի աջակցությամբ` ԱՄՆ Միջազգային զարգացման գործակալության ﬕջոցով: Նյութի բովանդակության համար պատասխանատվություն է կրում «Գորիսի մամուլի ակումբ» ՀԿ-ն և պարտադիր չէ, որ այն արտահայտի ԱՄՆ ՄԶԳ կամ ԱՄՆ կառավարության տեսակետները։
