Հունիսի 7-ին կայանալիք ՀՀ Ազգային ժողովի ընտրությունների նախընտրական քարոզարշավի շրջանակներում «Հանրապետություն» կուսակցության թիմը հյուրընկալվել էր Գորիսում։
Ընտրական ցուցակի առաջին համարը զբաղեցնող Արամ Սարգսյանը ներկայացրեց քաղաքական թիմի ծրագիրը՝ շեշտադրելով «ԹՐԻՓՓ»-ի ճանապարհի ընձեռած հնարավորությունները հատկապես Սյունիքի և Գորիսի զարգացման համատեքստում։
Նշվեց, որ տասը տարի անց Գորիսը կարող է դառնալ Հայաստանի ամենաբնակեցված բնակավայրերից մեկը, քանի որ ապագայում այն հանդես է գալու որպես տարածաշրջանային պետությունները կապող ռազմավարական կարևոր հարթակ։
Ծրագրային առաջնահերթություններից մեկը վերաբերում է գյուղատնտեսությանը, մասնավորապես ոռոգման համակարգերի արդիականացմանը, քանի որ ներկայիս թերությունները խոչընդոտում են տնտեսական աճին։
Կուսակցության արևմտամետ կողմնորոշումը դիտարկվում է որպես գործիք՝ արագացնելու վիզաների ազատականացման գործընթացը և խորացնելու հարաբերությունները արևմտաեվրոպական երկրների հետ։
Քարոզարշավի ընթացքում թիմը շրջել է Գորիսի փողոցներով, զրուցել բնակիչների հետ և մանրամասնել տուրիզմի, կրթության, գյուղատնտեսության ու անվտանգության ոլորտներում նախատեսվող բարեփոխումները։
