2026 թվականին Գորիս համայնքում ընտրությունները տեղի կունենան նոր՝ վերախոշորացված համայնքի սահմաններում՝ ներառելով նախկին Տաթև և Տեղ համայնքները։
Վերախոշորացման վերաբերյալ բնակիչների սպասումներն ու մտահոգությունները հասկանալու համար այցելել ենք Տանձատափ և Խոզնավար բնակավայրեր։ Խոզնավարում բնակիչները հիմնականում դրական են գնահատում վերախոշորացումը՝ ակնկալելով հանրային ծառայությունների ավելի մեծ հասանելիություն։ Օրինակ՝ բժշկական ուղեգիր ստանալու համար նախկինում ստիպված էին հասնել 30 կմ հեռավորության վրա գտնվող Տեղ, մինչդեռ Գորիսը գյուղից ընդամենը 18 կմ է հեռու։
Տանձատափում տրամադրություններն այլ են։ Բնակիչները մտահոգված են, որ վերախոշորացումից հետո գյուղը կարող է դուրս մնալ համայնքային իշխանությունների ուշադրությունից։ Երկու բնակավայրերում էլ կարևոր խնդիր է բնակիչների մասնակցությունը համայնքային որոշումների կայացմանը։ Միջբնակավայրային տրանսպորտի բացակայությունը դժվարացնում է Գորիս հասնելն ու ավագանու նիստերին մասնակցելը։ Չնայած տարբեր սպասումներին՝ բնակիչներին միավորում է մեկ ակնկալիք՝ իրենց խնդիրները պետք է լսելի լինեն, իսկ լուծումները՝ տեսանելի։ Վերախոշորացման արդյունավետությունը կախված կլինի նրանից, թե ինչպես կապահովվեն բնակավայրերի համաչափ զարգացումը, ծառայությունների հասանելիությունն ու բնակիչների մասնակցությունը համայնքային կառավարմանը։
Լրագրողներ՝ Ալինա Վարդանյան, Մանե Կարպետյան
