Սուսաննա Շահնազարյան
ՀՀ կառավարության կողմից կորոնավիրուսի տնտեսական հետևանքների չեզոքացման տասնմեկերորդ միջոցառման նպատակն է աջակցել վիրուսի տարածման հետևանքով գոյացած դժվարությունների արդյունքում սոցիալական խնդիրների առջև կանգնած մի խումբ անձանց:
Այս ծրագրով կառավարությունը կփոխհատուցի բոլոր այն ընտանիքների գազի ու էլեկտրաէներգիայի վարձավճարների մի մասը, որոնց փետրվար ամսվա վարձավճարները չեն գերազանցել գազի սպառումը` 10 000 և էլեկտրաէներգիայինը` 5 000 ՀՀ դրամը:
Գորիսի տարածաշրջանում՝ ներառյալ Տեղ, Տաթև համայնքներ, այս աջակցությունից կօգտվի գազի բաժանորդների գրեթե կեսը։ Փետրվար ամսին 7700 բաժանորդից մինչև 10 000 դրամի գազ (կամ 72 խոր/մ) սպառել է 3500 բաժանորդ։
Էլեկտրաէներգիայի բնակիչ բաժանորդների՝ էներգիայի սպառման պատկերը, օրինակ Գորիս քաղաքի մեկ թաղամասի կտրվածքով, այսպիսին է՝ 600 բաժանորդից այս աջակցությունից կօգտվի 160-ը, ովքեր փետրվարին սպառել են 110կվտ էներգիայից ոչ ավելի էլեներգիա ( 0,38 կՎ և ցածր լարմամբ սնվող սպառողներ)։
Գյուղական բնակավայրերում, ըստ էներգամատակարարների, մինչև 5 հազար դրամ էլեկտրաէներգիա սպառողների թիվն ավելի մեծ է, քան՝ քաղաքում։
ՀՀ կառավարության մեկ այլ որոշմամբ, սպառված գազի և էլեկտրաէներգիայի գումարի 30 տոկոսի չափով փոխհատուցում կտրվի նաև բնական գազի սպառման գծով՝ 10-30 և էլեկտրաէներգիայի գծով՝ 5-10հազար դրամ ծախսած բաժանորդներին։ Այս աջակցությունից, Գորիսում կօգտվի 1400 ընտանիք։
