Սյունիքի մարզի Գորիս, Տեղ, Տաթև համայնքներում Հոկտեմբերի 17-ին համամասնական ընտրակարգով կայանալիք ՏԻՄ ընտրությունների ժամանակացույցով օգոստոսի 2-ից սկսվել է քաղաքական կուսակցությունների, դրանց դաշինքների կողմից թեկնածուների ցուցակների ներկայացման գործընթացը։
Թիվ 34 տարածքային ընտրական հանձնաժողովի (ընդգրկում է Սիսիան, Տաթև, Գորիս, Գորայք, Տեղ համայնքների ընտրատարածքները) նախագահ Սլավիկ Դադաշյանի խոսքով օգոստոսի 7-ի դրությամբ կուսակցություններից դիմումներ դեռևս չեն ներկայացվել։ Հանձնաժողովի նախագահը նշում է, որ թեկնածուների առաջադրման ժամկետն ավարտվում է դեռ մեկ շաբաթ հետո, և պատճառը, որ դեռևս որևէ քաղաքական ուժ թեկնածուներ չի առաջադրել, կապված է ներկայացվելիք անհրաժեշտ փաստաթղթերի ծավալի հետ։
Գրանցման համար սահմանված ժամկետի ավարտից հետո՝ 5 օրվա ընթացքում կուսակցությունների, դաշինքների ընտրական ցուցակում ընդգրկված ավագանու անդամների թեկնածուները պետք է գույքի և եկամուտների մասին հայտարարագրեր ներկայացնեն։
Սեփ․ լրատվություն
