«Յուրաքանչյուր երեխա արժանի է իր հնարավորությունները լիարժեք իրացնելու» գաղափարի շուրջ կազմակերպված միջոցառումը համախմբել է կրթության ոլորտի պատասխանատուների, ՀՀ կրթության տեսչական մարմնի ներկայացուցիչների, ՏՄԱԿ-ների և դպրոցների տնօրենների, մանկավարժների ու ոլորտի մասնագետների։
Աշխատաժողովի ընթացքում ամփոփվել է կենտրոնի տասնամյա գործունեությունը, ներկայացվել են ձեռքբերումներն ու կրթական հաստատությունների հետ համագործակցության փորձը։ Մասնակիցները քննարկել են նաև ներառական կրթության կազմակերպման խնդիրներն ու զարգացման հնարավորությունները։
Բացման խոսքում ընդգծվել է, որ կենտրոնի անցած ճանապարհը միայն կառույցի ձևավորման պատմություն չէ․ այն նաև երեխաների կրթական իրավունքների իրացմանը, նրանց կարողությունների բացահայտմանն ու զարգացմանն ուղղված աշխատանքի պատմություն է։
ՀՀ Սյունիքի մարզպետի աշխատակազմի կրթության, մշակույթի և սպորտի վարչության պետ Մերի Գանդալյանը շնորհավորել է կենտրոնի աշխատակիցներին և բարձր գնահատել նրանց աշխատանքը։
«10 տարի՝ հոգատարության, աջակցության և միասնական աշխատանքի ուղի։ Կենտրոնի ստեղծումն ու կայացումը հեշտ ճանապարհ չի եղել, սակայն ձեր նվիրվածության, համառ աշխատանքի և միասնական ջանքերի շնորհիվ կենտրոնը դարձել է դպրոցների և կրթական համայնքի կարևոր ու վստահելի գործընկեր»,– նշել է նա։
Աշխատաժողովի առանցքային հատվածներից էր «Կրթության կազմակերպման արդի մարտահրավերներն ուսումնական հաստատություններում ներառականության համատեքստում» խորագրով պանելային քննարկումը։ Դրան մասնակցել են ՀՀ կրթության տեսչական մարմնի ղեկավար Վաղարշակ Մատիկյանը, ՀՄԿ տնօրենի տեղակալ Հայկուհի Ադամյանը, Երևանի թիվ 3 ՏՄԱԿ-ի տնօրեն Գոռ Մսրիկյանը Գորիսի համայնքապետարանի աշխատակազմի հանրային կապերի, կրթության, մշակույթի, սպորտի, երիտասարդության և սոցիալական հարցերի բաժնի գլխավոր մասնագետ Մարիաննա Աբգարյանը և Խոտի միջնակարգ դպրոցի տնօրեն Ալիսա Մինասյանը։
Քննարկման մասնակիցներն անդրադարձել են ուսումնական նյութերի հարմարեցմանը, սովորողների ներգրավվածությանը, մանկավարժների մասնագիտական կարողություններին և դասարանների մեծ թվակազմին։
Ալիսա Մինասյանը ներկայացրել է 3-րդ և 4-րդ աստիճանի կրթական դժվարություններ ունեցող սովորողների ուսուցման ընթացքում առաջացող գործնական խնդիրները։ Նրա խոսքով՝ անհատական ուսուցման պլանների առկայության պայմաններում էլ ուսուցիչները դժվարություններ են ունենում նյութերը պարզեցնելու, հարմարեցնելու և սովորողների լիարժեք մասնակցությունն ապահովելու հարցում։
Գոռ Մսրիկյանը նշել է, որ ոլորտում տարեցտարի դրական տեղաշարժ է նկատվում, սակայն մանկավարժների ներառող դասավանդման կարողությունների զարգացումը շարունակում է արդիական մնալ։ Նա որպես հնարավոր լուծում առանձնացրել է «Ռեսուրս-դասարան» ծրագիրը։ Անդրադառնալով դասարանների թվակազմին՝ Մսրիկյանը նկատել է, որ մինչև 35 սովորող ունեցող դասարաններում կրթության առանձնահատուկ պայմանների կարիք ունեցող 2–4 երեխաների արդյունավետ ներառումն ավելի բարդ է։
Գորիսի ՏՄԱԿ-ի տնօրեն Հերմինե Շալունցը ներկայացրել է կենտրոնի տասնամյա գործունեությունը, մասնագիտական թիմի զարգացումն ու կրթական հաստատությունների հետ ձևավորված համագործակցությունը։ Աշխատաժողովում զեկույցներով հանդես են եկել նաև ՏՄԱԿ-ների և դպրոցների տնօրեններ, ՀՄԿ-ի ներկայացուցիչներ ու ոլորտի այլ մասնագետներ։
Հոբելյանական հանդիպումն ամփոփեց կատարված աշխատանքը, փոխանակելու փորձը և քննարկելու առաջիկա անելիքները՝ յուրաքանչյուր երեխայի կրթության ու զարգացման համար ավելի նպաստավոր պայմաններ ստեղծելու նպատակով։
