Գորիսի համայնքապետարանը կազմակերպել էր հանրային քննարկում, ներկայացնելու ընթացիկ տարվա ընթացքում Գորիս համայնքի տնտեսական և սոցիալական զարգացմանն ուղղված սուբվենցիայի ծրագրերը, որոնց թվում նախատեսվում են իրականացվել Գորիս քաղաքի Ավանգարդ 5-րդ թաղամասի մոտեցման ճանապարհների, քաղաքի թիվ 3 նախակրթարանի հիմնանորոգման, Գալստյան փողոցի բազմաբնակարան 60-րդ շենքի բակի, Մաշտոցի փողոցի թիվ 146, 148, 150 բնակելի շենքերի բակերի ասֆալտապատման և բարեկարգման աշխատանքներ։ Ծրագրերի թվում նախատեսվում է նաև վերակառուցել Քարահունջ բնակավայրի կոյուղու ցանցի ջրամատակարարման ցանցը։
Նախատեսվող ծրագրերը ներկայացրեցին Գորիս համայնքի ղեկավարի օգնական Կարեն Ջավահիրյանը և ավագանու անդամ Իրինա Յոլյանը։
Հանրային քննարկման ընթացքում Արթուր Խոջաբաղյանը առաջարկեց, որ նախընտրելի կլիներ, եթե ներկայացվող աշխատանքների մասին նախապես օնլայն քննարկում կազմակերպվեր առաջնահերթությունները որոշելու համար։ Նրա խոսքով կարևոր է նաև համայնքի տարբեր տեղերում ապաստարաններ ունենալու հարցը։
Հանդիպման մասնակիցները համայնքային իշխանություններին ներկայացրեցին համայնքում իրականացվող ընթացիկ աշխատանքների մասին տարբեր հարցեր։
