Գորիսի համայնքապետարանի նիստերի դահլիճում տեղի ունեցավ Գորիս համայնքի 2023թ․ բյուջեի հանրային քննարկում։ Համայնքապետարանի ֆինանսատնտեսական և եկամուտների հավաքագրման բաժնի պետ Նարեկ Մնացականյանը ներկայացրեց 2023թ․ Գորիս համայնքի բյուջեի եկամուտները, նշելով, որ եկող տարվա համար համայնքին տրվող պետական լրավճարը նվազել է․ նախկին 169մլն 984 հազար դրամի փոխարեն կհատկացվի մոտ 70 մլն։ Լրավճարի վերանայումը, ըստ բանախոսի, կապված է գույքահարկի բազայի ճշգրտման հետ, ինչը օբյեկտիվ ցուցանիշ չէ։
«Ցավոտ հարցն այն է, որ համահարթեցումը նվազել է, և այս տարի պլանավորում ենք տարբերությունը լրացնել տեղական վճարների և տուրքերի հաշվին։ Ընդհանուր այլ մեխանիզմ է անհրաժեշտ կիրառել, քանի որ բյուջեի մասնահանման ընդհանուր թիվը փոքր է, որովհետև Երևան քաղաքի մեկ բնակչի հաշվով լրավճարը երկուսուկես անգամ ավելի է, քան Գորիս կամ մեկ այլ համայնքինը։
Կարևոր է, որ այլ մեխանիզմներ սկսեն կիրառել, որպեսզի և պետական բյուջեի մասնահանման ցուցանիշը մեծ լինի և դրան զուգահեռ՝ մայրաքաղաքի և մարզի հատկացումների տարբերությունները նվազեն»։Ներկայացվեց բյուջեի վարչական մասը, ինչպես նաև համեմատական վերլուծություն այն մասին, որ նախորդ տարիների ցուցանիշերն ավելի բարձր են եղել, քան այս տարի, քանի որ աշխատավարձերի մասնակի բարձրացում է կատարվել։
Նախատեսվում է, որ Գորիս համայնքի 2023թ․ բյուջեն կկազմի 1մլրդ․ 150 մլն 157 հազար դրամ, որը նախորդ տարվա համեմատ ավելի է մոտ 35 միլիոն դրամով։
Ակնկալվում է, որ եկող տարում կավելանան համայնքի սեփական եկամուտները, որի նախադեպն արդեն իսկ ընթացիկ տարում արձանագրվել է, ինչպես, օրինակ, շինթույլտվություններից ստացվող եկամուտները երկու անգամ աճել է նախորդ տարիների համեմատ։
Հանգստի և մշակութային ծառայությունների համար 2023թ․ բյուջեով նախատեսված է 83 մլն 750 հազար դրամ, որից 72 մլն դրամը՝մշակույթի տների, ակումբների և կենտրոնների համար, կրթության համար՝481 մլն դրամ, որից 335մլն՝նախադպրոցական կրթության համար, իսկ 146 մլն արտադպրոցական դաստիարակության համար։
