Ապրիլի 26-ին Գորիսի պետական դրամատիկական թատրոնում կայացավ «Մայրը» ներկայացումը, որը բեմադրվել է չեխ գրող Կարել Չապեկի «Մայրը» պիեսի հիման վրա։ Պիեսը մի կնոջ մասին է, ում չորս որդիներն ու ամուսինը զոհվում են պատերազմում։ Մնում է միայն նրա կրտսեր որդին, ով նույնպես որոշում է գնալ պատերազմ, քանի որ հայրենիքը վտանգի մեջ է։ Մայրն ամեն գնով փորձում է հետ պահել միակ որդուն։ Փաստավավերագրական ներկայացումը հոգու տոկունության, անձնազոհության, հայրենիքի հանդեպ անսահման և անմնացորդ սիրո մասին է, որի գաղափարախոսության կրողներն ու տարածողները մայրերն են․ այն նաև մեծ ուղերձ է մայրերին․․․
Բոլոր ժամանակներին համահունչ դեպքեր են, թե՛ եղբայրական թշնամությունը՝ հիմնված քաղաքական հողի վրա, թե՛ տարաձայնությունները, թե՛ հայրենիքը վտանգի մեջ լինելու պահին ընտանեկան համախմբվածությունը, որոնք գոյություն ունեցող համամարդկային խնդիրներ են։ Բեմադրող ռեժիսորը Ասյա Սիրեկանյանն է, ով նաև Գորիսի պետական դրամատիկական թատրոնի գլխավոր ռեժիսորն է։
Ներկայացման պրեմիերան կայացել է մարտին, որը հանդիսատեսի շրջանում ջերմ, դրական արձագանքներ և մեծ հնչեղություն է ստացել։ Թատրոնի տնօրեն Սյուզաննա Խաչատրյանի խոսքով՝ առաջին երկու պրեմիերաների ընթացում թատրոնի մեծ դահլիճը լեփ–լեցուն էր, ազատ նստատեղեր չկային։ «Ներկայացումը հետաքրքրել է նաև բարձր դասարանների աշակերտներին, և թեև ի սկզբանե մտավախություն կար, որ նրանք այնպես չեն ընկալի, ինչպես բարձր տարիքի հանդիսատեսը, սակայն մեր սպասումները հակառակն ապացուցեցին, նրանց կողմից ևս շատ սիրվեց ներկայացումը»,-ասում է Ս․Խաչատրյանը։
Ներկայացման հիմնական դերասանական կազմը Գորիսի պետական դրամատիկական թատրոնի դերասաններն են՝ Վանուհի Խաչատրյանը, Ակսել Բակունցը, Միքայել Մաշուրյանը, Հարութ Բադիրյանը,Մհեր Խազարյանը, նաև աշակերտներ՝ Կամո Մանանյան, Նվեր Մանուցյան, ովքեր դերասանական փոքր փորձառություն ունեն։։
Մայիսի 17-ից 31-ը Գյումրիում կանցկացվի «Գյումրու միջազգային թատերական փառատոն»-ը, որի շրջանակներում Գյումրիի հանդիսատեսին կներկայացվեն հայաստանյան և միջազգային թատրոնների և թատերախմբերի 23 ներկայացումներ։ Վաղարշ Վաղարշյանի անվան Գորիսի պետական դրամատիկական թատրոնը ևս կմասնակցի փառատոնին՝ «Մայրը» ներկայացմամբ։ Նախատեսվում է նաև նույն ներկայացմամբ մայիսին հյուրախաղերով հանդես գալ Սևանի և Գավառի թատրոններում։ Արդեն իսկ ներկայացումը դիտելու հնարավորություն է ունեցել կապանցի հանդիսատեսը։
