Արցախից տեղահանվելուց հետո Սուրեն Զաքարյանը հաստատվել է Վայոց ձոր մարզի Մալիշկա գյուղում։ Քառասունչորսօրյա պատերազմից հետո մեկ ամիս ապրել է Գորիսում, մտադիր էր բիզնեսով զբաղվել, բայց ասում է, որ բնակարանի վարձակալության գները բարձր էին, ուստի տեղափոխվել է Վայոց ձոր։
Սուրենը մասնագիտությամբ խոհարար է, ապրել է Արցախի Ղազարապատ գյուղում, զբաղվում էր անասնապահությամբ, մեղվապահությամբ, նաև սննդի կետ ուներ։ Նա ցանկություն ունի երիտասարդների ժամանցի ու ակտիվ կյանքի ապահովման համար ամառային ճամբար կազմակերպել գյուղում։
Այստեղ նրան անվճար տարածք են տրամադրել, ինքը ևս ներդրում է կատարել, և առևտրի կետ է բացել։ Մտածում է սրճարան-արվեստանոց հիմնադրելու մասին, որը յուրահատուկ քննարկումների հավաքատեղի ու ժամանցի վայր կդառնա գյուղի երիտասարդության համար։ Այս հարցում նաև իշխանությունների աջակցությունն է ակնկալում։
Սուրենի խոսքով իր նախաձեռնությունը կարող է նաև գյուղում զարգացնել զբոսաշրջությունը, նշում է, որ աղջիկը զբոսավար է, ձմռանն իրենց գյուղ զբոսաշրջիկներ է բերել, և հենց այդպես էլ ծագել է միտքը։
Տեղական իշխանությունները Սուրենի նախաձեռնությանը դրական են վերաբերվում, ասելով, որ այն ինտեգրվելու լավագույն հնարավորություն է, նաև պատրաստակամ են հիմնավորված առաջարկ ներկայացնելու պարագայում աջակցել ֆինանսապես։
Սուրենը մասնակցում է մարզի տարածքում կազմակերպվող տարբեր նախաձեռնությունների, դասընթացների՝ ցանկանալով զարգացնել կարողությունները, մասնավորապես հետաքրքրված է բիզնես հմտություններով, որոնք կներդնի իր բիզնեսում։
Նվեր Սարգսյանը Ասկերան քաղաքից է։ Ընտանիքի հետ տեղահանվել են 2023 թվականի սեպտեմբերի 26-ին։ Բնակություն են հաստատել Վայոց ձորի Գետափ գյուղում։ Աշխատում է Արենիի համայնքապետարանում, գյուղատնտես է։
Նվերը պատմում է, որ խաղային կենտրոնի և երիտասարդների համար ժամանացի վայրի մտահղացումը առաջացել է եղբոր մոտ, երբ տեսել է, որ գյուղում երեխաների համար չկա ժամանցի վայր, որոշել է գյուղում ակտիվությունն ապահովել։
Նվերն ու Սերգեյը սկսել են աշխատել այդ ուղղությամբ։ Տարածքի վերանորգումը դեռևս ամբողջովին ավարտված չէ։ Սակայն մասնակի կահավորված է։ Եղբայրները նախատեսում են նաև փոքրիկ ընթերցասրահ բացել, երեխաների համար զարգացման կենտրոն, որը կապահովի նաև գյուղի երեխաների արտադպրոցական ժամանացն ու կրթությունը։
Տեղացիներն ասում են, Նվերն ու Սերգեյը Գետափ են բերել նոր շունչ, աշխուժություն, երեխաներն իրենց օրը հետաքրքիր անց են կացնում։
Եղբայրներն ունեն նաև այլ մտադրություններ, ամռանը՝ երեկոյան ժամերին, գյուղում ակտիվությունն ապահովելու համար ցանկանում են գյուղապետարանի հարակից հատվածում հիմնել պուրակ։ Այս ուղղությամբ նախատեսում են ստորագրահավաք սկսել և ներկայացնել գյուղապետարան։
Եղեգնաձորի համայնքապետարանից mediapoint.am-ին հաստատում են, որ եղբայրների նախաձեռնությանն աջակցելու են, քանի որ դրանով գյուղական բնակավայրի մարդկանց հանգստի կազմակերպման, այլընտրանքային կրթության հնարավորություն կստեղծի.
«Մեր կորցրածը մենք վերագտել ենք Գետափում, այստեղ զգում ենք Արցախի շունչը»,- ասում են եղբայրները։
AKlfjdalksjfdlkj askljfaskdlfj wqelkfj aaskldfj lqkewjf lkjads fqlekwfj
