Գորիսի շուկայում արդեն գրեթե հիսուն տարի սերմեր վաճառող տիկին Ռայիսան յուրաքանչյուր գնորդի ոչ միայն սերմ է վաճառում, այլև խորհուրդներ է տալիս՝ երբ ցանել, ինչ խորությամբ, որքան հաճախ ջրել։ Մի ժամանակ աշխատում էր Գորիսի տրիկոտաժի ֆաբրիկայում։ Մի օր, հորը օգնելու համար եկավ շուկա ու այլևս գործարան չվերադարձավ։ Սկզբում՝ հոր հետ, հետո՝ ինքնուրույն, զբաղվեց սերմերի վաճառքով, որն այսօր նրա համար ոչ միայն աշխատանք է, այլ նաև սիրելի զբաղմունք։ Ռայիսայի համար սա մի ամբողջ արարողակարգ է՝ սկսած փոքր թղթե տոպրակներ պատրաստելուց, ինչպես ինքն է ասում՝ «կլյոկներից», մինչև սերմերի տեսակավորումը՝ ըստ ծլունակության։ Նա ասում է՝ այնպես պիտի փաթեթավորես, որ թղթի ծալքերից ոչ մի հատիկ չթափվի․ կան մարդիկ, ովքեր երբեմն ընդամենը մի քանի հատիկ են գնում։ Ու մարդիկ Գորիսի շուկայում գնումներ անելիս երբեք չեն բաց թողնում Ռայիսայի հետ մի քանի բառ փոխանակելու հնարավորությունը, որովհետև նրա մոտ գնումը պարզապես առևտուր չէ․ դա նաև զրույց է, խորհուրդ, երբեմն՝ հիշողություն ու ջերմություն, որ սերմի նման անցնում է ձեռքից ձեռք ու շարունակում աճել մարդկանց մեջ։
