Աապրիլի 27-ին «ԳորիսԼԱԲ» համայնքային զարգացման կենտրոն ՀԿ-ն հերթական հանրային քննարկումն անցկացրեց Սյունիքի մարզի Տեղ համայնքի սահմանամերձ Կոռնիձոր բնակավայրում։ Քննարկման թեման էր՝ «Անվտանգությունն ու ժողովրդավարությունը սահմանամերձ համայնքներում ԱԺ ընտրությունների համատեքստում․ ինչպես են դրանք ամրապնդում միմյանց»։
Բնակավայրում, որը գտնվում է սահմանից ընդամենը 300 մետր հեռավորության վրա, անվտանգության հարցն առաջնային է, sակայն, ինչպես փաստեցին մասնակիցները, Կոռնիձորում անվտանգությունն ընկալվում է ոչ միայն որպես ֆիզիկական կամ ռազմական պաշտպանվածություն, այլև սոցիալ-տնտեսական կայունություն, համայնքային վստահություն և կառավարման արդյունավետություն։
Փորձագետ, Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը ներկայացրեց անվտանգության և ժողովրդավարության փոխկապակցվածությունը՝ նշելով, որ կարևոր է հասկանալ, թե պետական մակարդակում ինչ սկզբունքներով և ճանապարհներով են լուծվում այդ խնդիրները ։
Քննարկվեց նաև Տեղական ինքնակառավարման մարմինների դերը. համայնքների ֆինանսական կախվածությունը կենտրոնական իշխանություններից թույլ չի տալիս տեղական մակարդակում արագ և արդյունավետ լուծել ծագող խնդիրները՝ նվազեցնելով ժողովրդավարության գործնական արժեքը բնակիչների աչքերում։
Որպես համայնքի զարգացման գլխավոր խոչընդոտներ՝ բնակիչները մատնանշեցին աշխատատեղերի պակասը, գյուղմթերքի իրացման դժվարությունները և վերամշակող արտադրությունների բացակայությունը։ Այս ամենն ուղղակիորեն հանգեցնում է երիտասարդների արտագաղթի, ինչը համայնքի երկարաժամկետ կայունության գլխավոր սպառնալիքն է։ Չնայած ենթակառուցվածքների (ջուր, լուսավորություն) բարելավմանը, միայն դա բավարար չէ ժողովրդագրական ու տնտեսական ճգնաժամը կանխելու համար։
Համայնքի մարտահրավերներից է նաև ապատեղեկատվությունը, որն ուղղակիորեն իր ազդեցությունն է թողնում մարդկանց վստահության թուլացման վրա։ Նշվեց ինտերնետի ոչ բավարար հասանելիության խնդիրը, որն առաջնահերթ է հատկապես երկրում իրականացվող այն բարեփոխումներում ներգրավվելու համար, որոնցում անհրաժեշտ էօնլայն հարթակներից օգտվել։ Նկատելի է նաև պահանջատիրության պակաս. բնակիչները գիտեն իրենց խնդիրները, բայց հաճախ չեն օգտագործում ավագանու, համայնքապետարանի կամ պատգամավորների ինստիտուտները՝ դրանք բարձրաձայնելու համար։
***
«Սույն նյութը պատրաստվել է «ԳորիսԼԱԲ» համայնքային զարգացման կենտրոն ՀԿ-ի պատասխանատվությամբ և պարտադիր չէ, որ այն արտացոլի ԺԶՀ-ի պաշտոնական դիրքորոշումը»:
