Առաջիկա խորհրդարանական ընտրությունների քարոզարշավի շրջանակներում Սյունիք էր այցելել «Ուժեղ Հայաստան» դաշինքը՝ խորհրդի անդամ Նարեկ Կարապետյանի գլխավորությամբ։ Նախընտրական հանդիպման ընթացքում ներկայացվեցին դաշինքի ծրագրային հիմնական ուղղությունները, այդ թվում՝ Հայաստանում 300 հազար նոր աշխատատեղերի ստեղծումը և տուրիզմի ոլորտում մեկ միլիարդ դոլարի ներդրումների ներգրավումը, որից, ըստ դաշինքի ներկայացուցիչների, պետք է օգտվի նաև Գորիս համայնքը։
Հանդիպման ընթացքում ելույթներով հանդես եկան դաշինքի ներկայացուցիչներ Նարեկ Կարապետյանը, Իրինա Յոլյանը, Էդգար Ղազարյանը, Արթուր Միքայելյանը և Արամ Վարդևանյանը։ Նրանք անդրադարձան Սյունիքի անվտանգային մարտահրավերներին՝ ընդգծելով, որ մարզի անվտանգության, այդ թվում՝ ճանապարհային անվտանգության հարցերում դեռևս անհրաժեշտ են հստակ երաշխիքներ։
Կրթության ոլորտի վերաբերյալ նշվեց, որ մարզում գործող համալսարանը պետք է շարունակի իր գործունեությունը, իսկ հետագայում վերածվի տեխնոլոգիական համալսարանի՝ ներգրավելով տարբեր տեխնոլոգիական ընկերությունների։ Պաշտպանության ոլորտի մասին խոսելիս դաշինքի ներկայացուցիչները շեշտեցին, որ բանակը պետք է լինի պետության գլխավոր հենասյունը, իսկ Սյունիքը՝ այդ համակարգի կարևոր հատվածը։
Դաշինքի ներկայացրած ծրագրային առաջնահերթությունների թվում նշվեցին նաև նոր հարկային քաղաքականության ձևավորումը, գյուղատնտեսական արտադրանքի մթերման կետերի ստեղծումը և ներդրումային քաղաքականության խթանումը։
Հանդիպումից հետո «Ուժեղ Հայաստան» դաշինքի ներկայացուցիչներն ու համակիրները երթով քայլեցին Գորիսի փողոցներում։
