Համավարակից, ապա նաև Արցախյան երկրորդ պատերազմից հետո, 2021թ-ին նկատելի աճ է գրանցվել Գորիս համայնքի անշարժ գույքի շուկայում։ Վերջին տարիների համեմատ, փետրվարից սկսած, ավելացել է հատկապես վաճառվող բնակարանների թիվը։
«Կար-Գետափ» ՍՊԸ-ի տնօրեն Կամո Գրիգորյանն, ով 13 տարի Գորիսում զբաղվում է անշարժ գույքի բիզնեսով, ասում է, որ առք ու վաճառքի շուկան այս պահին ակտիվ է. մինչ պատերազմ ամսական վաճառվում էր երկուսից երեք տուն, իսկ այժմ վաճառողները շատացել են։ Բարձրացել է նաև բնակարանների վաճառքի գինը։
«Անշարժ գույքի շուկայի ակտիվության վրա ազդեցություն է ունեցել պատերազմը, մասնավորապես, այն հանգամանքը, որ տեղահանված արցախցիները բնակարաններ են ձեռք բերում»,- ասում է Կամո Գրիգորյանը: Նրա խոսքով, բնակելի տներից բացի, վաճառվում են նաև փոքր և միջին բիզնեսներ, արտադրական տարածքներ։
Անշարժ գույքի «Goris Realty» գործակալության տնօրեն Լիլիթ Մարտիրոսյանի խոսքով, 2021 թվականի մայիսին ընդհանրապես վաճառքներ չեն գրանցվել։ Նրա կարծիքով դա կապված է այդ օրերին Սև լճի մերձակայքում լարված իրավիճակով:
ՀՀ Արդարադատության նախարարության Սյունիքի մարզի «Գորիս» նոտարական տարածքի նոտար Առնո Առաքելյանը Գորիսում անշարժ շուկայի ակտիվացումը չի կապում պատերազմական և հատկապես, խուճապային տրամադրությունների հետ։ Նա նշում է, որ 2019 թվականին իրենց ծառայությունն աննախադեպ մեծ թվով գործարքներ է կատարել և հիմնականում՝ բնակարանների, հողամասերի առք ու վաճառքի։ Նոտարի խոսքով այդ ժամանակահատվածում կտրուկ բարձրացել էր հատկապես հողի վաճառքի գինը, մեծ թիվ էին կազմում մարդիկ, ովքեր արտերկրից հողատարածքներ էին ձեռք բերում Տաթև համայնքում։ Առնո Տատինցյանը շեշտում է, որ վերջին տարիների համեմատ բնակարանների վաճառքի գինը չի նվազում, և գնորդների պակաս էլ չի նկատվում, այսինքն, ի հակառակ շրջանառվող խոսակցությունների, անշարժ գույքը Գորիսում շարունակում է պահանջարկ ունենալ։
Վաճառքի հետ, բարձրացել են նաև բնակելի տարածքների վարձակալության գները․ եթե նախորդ տարի, անգամ մինչև մինչ պատերազմ, վարձակալության տրվող բնակարանների գինը մեկ քառակուսու համար չէր հասնում հինգ-վեց հարյուր դրամի, ապա այժմ այն որոշ դեպքերում տասնապատկվել է և ավելին։
Անշարժ գույքի թե՛ վաճառքի, և թե՛ վարձակալության գների վրա ազդեցություն ունի նաև այն հանգամանքը, որ համայնքի այլևս սահմանամերձ դարձած որոշ բնակավայրերից, ինչպես նաև Քաշաթաղի գյուղական համայնքներից տեղահանվածները բնակարաններ են ձեռք բերում Գորիսում, իհարկե, որոշ դեպքերում վարձակալության ժամկետները կարճաժամկետ են, քանի որ ոմանք մտավախություն ունեն, որ կրկին կարող են տեղահանվել։
Սույն հոդվածը հրապարակվել է ԵՄ ֆինանսական աջակցությամբ: Հոդվածը արտացոլում է հեղինակի կարծիքը և պարտադիր չէ, որ արտացոլի ԵՄ տեսակետը։
