Սեպտեմբերի 22-ին մեկնարկել է հոկտեմբերի 17-ին Գորիս, Տեղ, Տաթև համայնքներում կայանալիք ՏԻՄ ընտրությունների թեկնածուների նախընտրական քարոզարշավը, որի շրջանակներում կայացավ «Գորիս համայնքի ավագանու ընտրությանը մասնակցող «Հայ Ազգային Կոնգրես» կուսակցության նախընտրական ծրագրի շնորհանդեսը։
Ծրագրի նպատակի, համայնքի զարգացման ուղղությունների, հնարավորությունների, մասնավորապես, տնտեսության, մշակույթի, բնապահպանության, սոցիալական կառավարման նոր որակի, հանրային վերահսկողության, թափանցիկության ապահովման, շահերի բախման ռիսկերի կանխարգելման, համայնքի սեփական եկամուտների բազմազանության, հաղորդակցության որակի բարելավման, բնակավայրերի համաչափ զարգացման, ապակենտրոնացման գործում իրականացվող քաղաքականության վերանայման անհրաժեշտության և այլ հարցերի մասին ծրագրում ընդգրկված դրույթները մանրամասնեց Գորիս համայնքի ավագանու ընտրություններում Հայ Ազգային Կոնգրեսի ցուցակը գլխավորող Կարեն Լազարյանը։ Նրա ներկայացմամբ ծրագիրը մշակվել է «Գորիս համայնքի ընտրություններին մասնակցող ՀԱԿ ավագանու թիմի կողմից՝ հիմք ընդունելով Հայ ազգային կոնգրեսի՝ համայնքների զարգացման ծրագրի հիմնադրույթները»։
Ծրագրի նպատակն է «Գորիսը դարձնել կենսախինդ, գործունյա, արագորեն զարգացող և հպարտ քաղաք, որում ամեն ոք ունի աշխատելու, ստեղծագործելու, երջանիկ ապրելու հնարավորություն»։
«Մենք հայտնի ենք գորիսյան ուրույն մշակութային մթնոլորտի համբավով, որտեղ մարդիկ հոգատար են և ամուր են համայնքային կապերը։ Մեր խնդիրն է պահպանել այս ուժը, ամրությունը»-ասվում է ծրագրում:
Ըստ կուսակցության նախընտրական ծրագրի, ՀԱԿ-ը քաջատեղյակ է երկրի, համայնքի առջև ծառացած խնդիրներին, և ծրագրով մշակվել է այդ խնդիրները լուծելուն ուղղված քաղաքականություն, որով կուսակցությունը համայնքում արմատական փոփոխությունների հայտ է ներկայացնում։
Հանդիպման ընթացքում ելույթներով հանդես եկան Հայ Ազգային կոնգրես կուսակցության փոխնախագահ Լևոն Զուրաբյանը, ՀԱԿ խորհրդի անդամ Արամ Մանուկյանը, նախընտրական ցուցակով առաջադրված թեկնածու Նարե Հովհաննիսյանը։
Հանդիպումը վարում էր «Սյունյաց երկիր» թերթի խմբագիր Սամվել Ալեքսանյանը։
