Ինչպես արդեն նշել էր Անվտանգության խորհրդի քարտուղար Արմեն Գրիգորյանը, գիշերը 24։00 -ին տեղադրվել են Գորիս-Կապան ճանապարհին սահմանային և մաքսային հսկողության կետեր:
Այդ ճանապարհով են հասնում Որոտանի, Բարձրավանի և Շուռնուխի միջնակարգ դպրոցի երթևեկող ուսուցիչները։
Այսօր Բարձրավանի միջնակարգ դպրոցի երթևեկող չորս ուսուցիչներն իրենց դասերը կազմակերպել են հեռավար: Դպրոցի տնօրեն Սառա Հակոբյանի խոսքով՝ Սյունիքի մարզպետարան դիմելուց հետո վաղվանից երթևեկելու են իրենց տրամադրած մեքենայով՝ այլընտրանքային Խոտ գյուղի ճանապարհով։
Որոտանի միջնակարգ դպրոցի տնօրեն Ա․Գրիգորյանը նշում է, որ այսօր 13 երթևեկող ուսուցիչներ գնացել են այլընտրանքային ճանապարհով, բայց մարզպետարան գրություն է ուղարկել՝ առաջարկելով կամ տրամադրել մեքենա, որով կարող են հասնել դպրոց կամ էլ անցնեն հեռավար կրթության: «Ամեն դեպքում մենք էլք չունենք և հնարավոր ամեն կերպ հասնելու ենք աշխատանքի»,- նշում է տնօրենը, ով սպասում է մարզպետարանի պատասխանին։
Շուռնուխի միջնակարգ դպրոցի տնօրեն Ա․ Լալաբեկյանը նշում է, որ այսօր ուսուցիչներն աշխատանքի չեն ներկայացել, իսկ վաղվանից արդեն կգան այլընտրանքային ճանապարհով՝ մարզպետարանի տրամադրած մեքենայով։ Շուռնուխ դպրոցի ուսուցչուհի Ն․ Միրաքյանը նշում է, որ այսօր դաս չի եղել, քանի որ երեխաները հեռավար դասի հնարավորություն չունեն. Հեռախոսազանգով են հանձնարարություններ տվել։
Այնուամենայնիվ երեք դպրոցի ուսուցիչները պնդում են, որ հնարավորինս հասնելու են դպրոց և երեխաներին չեն թողնի առանց կրթության:
