Հոկտեմբերի 27-ին «Գորիսի մամուլի ակումբ» ՀԿ-ն ամփոփեց «Ինտերակտիվ, թափանցիկ բյուջե» ծրագրի արդյունքները։
Հանդիպման ընթացքում ՀԿ-ի նախագահ Սուսաննա Շահնազարյանը կարևորեց ծրագրի շրջանակում ՏԻՄ-երի հետ համագործակցությունը և հանրության իրազեկվածության մակարդակի բարձրացմանն ուղղված քայլերը, այդ թվում պատրաստված տեղեկատվական, անիմացիոն նյութերն ու Գորիս համայնքի ինտերակտիվ բյուջեն, որին կարելի է ծանոթանալ www.gorisbudget.am կայքում։
Ծրագրի փորձագետ Կարեն Հովհաննեսյանը մասնակիցներին ներկայացրեց «Սյունիքի մարզի Գորիս, Մեղրի, Տեղ, Սիսիան, Գորայք համայնքների բյուջեների հավաքագրման գործընթացների, դրանց վրա ազդող գործոնների մասին» հետազոտության հաշվետվության զեկույցը։
Գորիսի համայնքապետարանի ֆինանսատնտեսական և եկամուտների հավաքագրման բաժնի պետ Նարեկ Մնացականյանը հանդիպման մասնակիցներին ծանոթացրեց Գորիս համայնքի ինտերակտիվ բյուջեի կայքի բաժինների հետ։
Ծրագրի շրջանակում պատրաստվել է 13 հետաքննական, վերլուծական հոդված, որոնք հրապարակվել են «Գորիսի մամուլի ակումբ» ՀԿ-ի կայքէջում՝ www.mediapoint.am-ում։
Հանդիպմանը մասնակցում էին ՏԻՄ, ՀԿ ներկայացուցիչներ, քաղաքացիներ, ովքեր կարևորեցին իրականացված աշխատանքներ։
Ծրագիրն իրականացվել է Հայաստանում ԱՄՆ դեսպանատան ֆինանսական աջակցությամբ։
