Մայիսի 18-ը թանգարանների միջազգային օրն է, և մարդիկ հնարավորություն ունեն անվճար այցելել իրենց նախընտրած թանգարան։ Բացի այդ, թանգարաններում այդ օրն անցկացվում են տարբեր միջոցառումներ։ Այս տարի միջոցառումները կրելու են «Թանգարաններ, կրթություն և հետազոտություն» խորագիրը:
«Լինելու է լուսանկարների ցուցադրություն՝ նախահեղափոխական շրջանից, իսկ երեկոյան՝ թեյախմություն»,-ասում է Գորիսի երկրագիտական թանգարանի էքսկուրսավար Լիլյա Հարությունյանը:
Նրա խոսքով թանգարանի ամբողջական վերանորոգումը իրականացվել է 2002 թվականին՝ Save the Children կազմակերպության կողմից, սակայն 22 տարի անց կրկին կարիք կա վերանորոգման: Հատկապես մեծ է ջեռուցման խնդիրը, որը կարևոր է նաև ցուցանմուշների պահպանման համար:
Լիլյան նշում է, որ թանգարանն այնքան էլ ուշադրության կենտրոնում չէ, ներդրումներ չկան, հավաքածուների պահպանման համար անհրաժեշտ են մասնագետներ, ովքեր խորհուրդատվություն կարող են տալ, կփոխանակվեն փորձով, հնագետների և ազգագրագետների կարիք կա: Այդ ամենով հանդերձ, այցելուները շատ են. տարեկան երեք հազար մարդ է լինում, հիմնականում զբոսաշրջիկներ, դպրոցականներ, նաև համայնքի բնակավայրերից են:
Համերգային ծրագիր, թանգարանում գտնվող իրերի ցուցադրություն և բանախոսություն է նախատեսվում Ակսել Բակունցի տուն-թանգարանում:
Գորիսի Ակսել Բակունցի տուն-թանգարանի տնօրեն Վարդան Սարգսյանն ասում է, որ ունեն ներքին հարդարման, ցուցադրությունների նորացման անհրաժեշտություն, մոտ ժամանակներում թանգարանում զգալի աշխատանքներ են կատարվելու՝ ցուցափեղկերի նորացում, պատշգամբների վերանորոգում: Նշեց նաև, որ թանգարանը կարիք ունի օտարալեզու զբոսավարների հատկապես՝ ֆրանսերեն, անգլերեն լեզուներով։
Միջոցառում է նախատեսվում նաև Սերո Խանզադյանի տուն-թանգարանում:
Գրողի մատյան վիմագրության բնօրինակից ժամանակավոր ցուցադրություն է կազմակերպվելու, «Շուշի» վեպի քնարկում, թեմատիկ էքսկուրսիաներ ցուցանմուշների վերաբերյալ:
