Հենրիկ Իգիթյանի անվան գեղագիտության ազգային կենտրոնի Գորիսի մասնաճյուղում ելույթ ունեցավ «Vida Guitar Quartet»-ը։ Մարկ Իդենի, Մարկ Էիշֆորդի, Ամանդա Քուկի և Քրիս Ստելի կատարմամբ վայելեցին Ա. Խաչատրյանի, Ա. Վիվալդիի, Յ. Ս. Բախի, Շուբերտի, Ֆ. Պուլենկի, Ժ. Տուրինայի, Հ. Վիլա-Լոբոսի, Լ. Բեռնշտեյնի, Կոմիտասի ստեղծագործություններից։
Նվագախմբի ելույթից հետո բացվեց ՀՀ նկարիչների միության անդամ Արմեն Լորենցի գեղանկարչական աշխատանքների ցուցահանդեսը։
«Ես լոռեցի եմ, այս կտավներում Լոռին ու Սյունիքն են: Գորիսը գեղեցկություն է. այստեղ կա’մ նկարիչ, կա’մ բանաստեղծ կծնվես»,-ասաց Արմեն Լորենցը։
Գորիսի պետական համալսարանի ասիստենտ, համերգների կազմակերպիչ Կարինե Գրիգորյանի խոսքով նման միջոցառումների կազմակերպումը շարունակական է լինելու, քանի որ կարևոր է այնքանով, որ աճող սերունդն իր ձեռքը կարող է առնել գործիք և սկսել նվագել կամ վրձինը` նկարել։
«Դա ուտելու նման անհրաժեշտություն է… չէ, ոչ թե նման, այլ առավել։ Հետո էլ պետք է ոգեշնչվեն և ապրելու, արարելու ցանկություն ունենան։ Աշխարհը պահող ուրիշ բան չկա։ Մշակույթը մերձեցնում է։ Նման միջոցառումներ ինչքան շատ, այնքան լավ»,-ասաց նա։
Գեղագիտական կենտրոնի Գորիսի մասնաճյուղի տնօրեն Արամ Մաշուրյանը նշեց, որ առաջիկայում նախատեսվում է կազմակերպել հայ ականավոր նկարիչ Ռուբեն Ադալյանի ցուցահանդեսը, որը կարևոր իրադարձություն կլինի։
«Կարևորագույն նախաձեռնություններից մեկն էլ համարում եմ, որ պետք է անպայման ստեղծել համամարզային մասշտաբի պլեներային Սիմպոզիում, ինչը նոր ճանաչողական հարթակ կլինի ստեղծագործ անհատների համար»,-ասաց նա։
