Գորիս համայնքի Վերիշեն և Ակներ բնակավայրերի բնակիչները շուտով կկարողանան ձևավորել իրենց սեփական ջերմոցային տնտեսությունները՝ վերածելով հողը կայուն եկամտի աղբյուրի։
ՄԱԿ-ի Զարգացման ծրագրի «Կայուն համայնքներ» ծրագրի շրջանակում մեկնարկել է «Նեքսուս Գորիս» նոր մոդելը, որի նպատակն է խթանել գյուղական ձեռներեցությունը, կապ ստեղծել Գորիս քաղաքի և գյուղական բնակավայրերի միջև, ինչպես նաև ընդլայնել տեղական շուկաների հնարավորությունները։
Ծրագիրը մշակվել է «Նեքսուս» մոդելի հիման վրա, որը նորարարական մոտեցում է՝ միտված համագործակցային տնտեսությունների ձևավորմանը։ Այս փուլում նախատեսվում է Վերիշեն և Ակներ գյուղերի ավելի քան 20 շահառուի տրամադրել ժամանակակից 150 քմ մակերեսով թունելային ջերմատուն, անվճար ուսուցում, խորհրդատվություն և միասնական շուկայի ինտեգրում։ Մասնակիցները կձևավորեն կլաստեր՝ միավորված համագործակցության սկզբունքով, որպեսզի նվազեցնեն ծախսերը, կիսեն ռեսուրսներն ու ապահովեն արտադրանքի կայուն իրացում։
ՄԱԶԾ «Կայուն համայնքներ» ծրագրի ղեկավար Արման Վալեսյանի խոսքով՝ ծրագիրն ունի մի քանի նպատակ։ «Մենք ցանկանում ենք ոչ միայն աջակցել գյուղատնտեսական արտադրությանը, այլև նպաստել Գորիս համայնքում սննդի անվտանգության բարձրացմանը և ձեռներեցության զարգացմանը։ Նպատակ ունենք երկարացնել գյուղատնտեսական սեզոնը և բարձրացնել համայնքների ինքնաբավությունը։ Նեքսուսը հենց կապ է՝ կապ Գորիս քաղաքի և գյուղերի միջև», – ասաց նա։
Գորիս համայնքի ղեկավարի տեղակալ Իրինա Յոլյանն ընդգծում է, որ բնակավայրերի ընտրությունը պատահական չէ։ «Մենք Գորիս համայնքում փորձում ենք համաչափ զարգացնել տարբեր բնակավայրեր՝ տարբեր ուղղություններով։ Վերիշենը և Ակները ընտրվել են ջերմոցային ծրագրի համար, քանի որ ունեն հարմար տեղակայություն, և հետաքրքրված բնակչություն։ Այդ բնակավայրերից արդեն կան հաջողված օրինակներ նախորդ ծրագրերից, որոնք ոգեշնչել են մյուսներին», – նշեց նա։
Ծրագրի փորձագետ Մխիթար Բալայանի խոսքով՝ նախաձեռնությունը նախատեսում է տրամադրել նաև անվճար սածիլներ, սերմեր, մասնագիտական ձեռնարկ, խորհրդատվություն և բիզնես դասընթացներ՝ ներառյալ բիզնես պլանավորում, ֆինանսական կառավարում և մարքեթինգ։
Շահառուներից պահանջվում է 500,000 ՀՀ դրամ համաֆինանսավորում, որը կարող է վերադարձվել, եթե ջերմատան տեղադրումն իրականացվի շահառուի կողմից։
ՄԱԶԾ-ի աջակցության Վերիշենում և Ակներում արդեն կառուցվել է ջրամբար, ինչը հեշտացնում է ջրի հասանելիությունը ջերմատների արդյունավետ գործարկման համար։ Գյուղերի մոտ լինելը Գորիս քաղաքին թույլ է տալիս նվազեցնել տրանսպորտային ծախսերը և հեշտացնել արտադրանքի իրացումը։
Այս ծրագիրը հնարավորություն է համայնքի բնակիչների համար նոր հեռանկարներ բացելու, հողի վրա աշխատելով ստեղծել եկամտաբեր և երկարաժամկետ բիզնես՝ միաժամանակ ամրապնդելով տեղական տնտեսությունը։
Շահառու բանակավայրերի բնակիչները կարող են դիմել մինչև 2025 թվականի հուլիսի 25-ը՝ լրացնելով հայտը հետևյալ հղումով։
