Հայաստանի գրողների միության Սյունիքի մարզային բաժանմունքը հիմնադրվել է տասնամյակներ առաջ։ Մասնաճյուղը նպատակ ունի բացահայտել սկսնակ և արդեն փորձ ունեցող հեղինակների, ինչպես նաև աջակցել նրանց ստեղծագործական գործունեությանը։ Կազմակերպվում են գրքերի շնորհանդեսներ, գրական երեկոներ, հանդիպումներ ընթերցողների հետ։ Համայնքային իշխանության կողմից անվարձահայտույց տրված տարածքը, որը գտնվում է Գորիսի մշակույթի տան շենքում, ստեղծագործողներն անվանում են գրօջախ։ Մասնաճյուղի նախագահ Լևոն Սահակյանի խոսքով՝ գրողների միության անդամակցությունը որոշ չափով նպաստում է ստեղծագործողի ճանաչելիությանը, սակայն ստեղծագործությունների հրատարակման առումով որևէ աջակցություն չեն ստանում։ Միաժամանակ, առկա են մի շարք խնդիրներ։ Մասնավորապես՝ գրքերի տպագրության բարձր արժեքը հաճախ խոչընդոտում է ստեղծագործողների համար։ Շատերը չեն կարողանում ֆինանսավորել իրենց գրքերի հրատարակությունը՝ չունենալով բավարար միջոցներ կամ աջակցություն։ Բաժանմունքի նախագահի խոսքով՝ փորձեր են արվել ներգրավել հովանավորների, սակայն առայժմ արդյունք չի արձանագրվել։ Ներկայումս Հայաստանի գրողների միությանը Սյունիքից անդամակցում է 10 ստեղծագործող, իսկ մարզում ստեղծագործողների ընդհանուր թիվը հասնում է մոտ 100-ի։
