Ամառային արձակուրդներն արդեն կիսվել են, շատերն արդեն մեկնել են հանգստի, ոմանք դեռևս չեն կողմնորոշվում որտե՞ղ և ինչպե՞ս անցկացնել հանգիստը: Այս հարցում մարդկանց նախասիրությունները խիստ տարբերվում են. ոմանք ընտրում են վրանային ակտիվ կյանքն ու քայլարշավները հենց Սյունիքի բնության գրկում, մյուսները նախընտրում են բացահայտել եվրոպական քաղաքներն ու մշակույթները, շատերն այդ մասին չեն մտածում» www.mediapoint.am-ը շրջայց է կատարել Գորիսում, փորձելով պարզել, թե ինչպես են այս ամառ հանգստանալու մեր համաքաղաքացիները։ Տեղական զբոսաշրջային ներուժը ճիշտ օգտագործելու, բնակիչների ու հյուրերի հանգիստը գրագետ կազմակերպելու համար կարևոր դեր ունեն մասնագիտացված կառույցները: Գորիսեցիների հանգիստի կազմակերպման հարցում արդեն մեկ տարի է, ինչ օգնության է հասնում «ԼԱ ՎԻՍՏԱ ԹՐԱՎԵԼ»-ի զբոսաշրջային ընկերության Գորիսի մասնաճյուղը: Գործակալությունն առաջարկում է ինչպես ներգնա, այնպես էլ արտագնա զբոսաշրջային փաթեթներ: Աշխատակցի խոսքով այս սեզոնին արտագնա ուղղություններից ամենապահանջվածներն են Դուբայը, Եգիպտոսը, Վրաստանը, Թունիսն ու Ալբանիան, պայմանավորված նրանով, որ Հայաստանի քաղաքացիների համար այդ երկրների մուտքի վիզա չի պահանջվում։ Ֆինանսական գործոնը զբոսաշրջության մեջ հաճախ դառնում է ամենաորոշիչը, չնայած շատերն այնուամենայնիվ, նախընտրում են հանգիստն անցկացնել Հայաստանից դուրս։ Չնայած արտագնա տուրերի մեծ պահանջարկին, ներքին շուկան ևս չի զիջում իր դիրքերը, հատկապես երբ խոսքը պետական աջակցության՝ սոցիալական փաթեթների մասին է: Հայաստանյան հանգստավայրերի ընտրության հարցում գորիսեցիների համար առաջնային են դառնում հեռավորությունն ու հարմարավետությունը՝ նախապատվությունը տալով հատկապես մոտակա առողջարանային քաղաքներին:
