Հին Խնձորեսկ պատմամշակութային արգելոցի տարածքում ավարտին են մոտեցել «Հողի արձագանքներ» ծրագրով նախատեսված աշխատանքները։ Ծրագրի շրջանակում բարեկարգվել և գծանշվել է 5.4 կմ երկարությամբ քայլարշավային արահետ, տեղադրվել են ուղղորդող ցուցանակներ, նստարաններ ու աղբամաններ։
Ծրագիրը մեկնարկել է 2025թվականին՝ «Փրկենք հայկական հուշարձանները» կազմակերպության նախաձեռնությամբ և Հ. Հովնանյան ընտանեկան ու Թուֆենկյան բարեգործական հիմնադրամների ֆինանսական աջակցությամբ։ Նպատակն է նպաստել Հին Խնձորեսկի պատմամշակութային ժառանգության պահպանմանն ու հանրահռչակմանը, ինչպես նաև տարածքն ավելի անվտանգ և հասանելի դարձնել այցելուների համար։
Իրականացված աշխատանքների ընթացքում մաքրվել են հուշարձաններն ու հարակից տարածքները։ Հին և Նոր Խնձորեսկը կապող դժվարանցանելի հատվածներում կառուցվել են քարե և փայտե աստիճաններ։ Արահետի երկայնքով տեղադրվել են հայերեն, անգլերեն և ռուսերեն ուղղորդող ու տեղեկատվական ցուցանակներ։ Բարելավվել են նաև այցելուների համար նախատեսված ենթակառուցվածքները։
Արահետի բարեկարգման աշխատանքներն իրականացվել են «Արահետներ հանուն փոփոխության» հասարակական կազմակերպության հետ համագործակցությամբ։
«Այս ծրագիրը կարևոր քայլ էր Սյունիքի ամենանշանակալի պատմամշակութային վայրերից մեկի պահպանման, վերարժևորման և հանրահռչակման ճանապարհին։ Վստահ ենք, որ իրականացված աշխատանքները կնպաստեն նաև համայնքում կայուն զբոսաշրջության զարգացմանը»,— նշել է ծրագրի համակարգող Գայանե Բուդաղյանը։
Հ. Հովնանյան ընտանեկան հիմնադրամի գործադիր տնօրեն Կորյուն Խաչատուրյանի խոսքով՝ պատմամշակութային ժառանգության պահպանմանը զուգահեռ անհրաժեշտ է ընդլայնել դրա հասանելիությունը։ Նա ընդգծել է, որ մշակութային և քայլարշավային ենթակառուցվածքների զարգացումը կարող է նպաստել մարզերի տնտեսական զարգացմանն ու կայուն զբոսաշրջությանը։
Թուֆենկյան բարեգործական հիմնադրամի տնօրեն Հուսիկ Սարգսյանն էլ նշել է, որ նոր արահետը հնարավորություն կտա այցելուներին ավելի անվտանգ պայմաններում բացահայտել Հին Խնձորեսկի պատմամշակութային ժառանգությունը։ Նրա գնահատմամբ, նախաձեռնությունը կարող է նպաստել նաև զբոսաշրջային հոսքերի ավելացմանն ու Սյունիքի տնտեսական ակտիվության խթանմանը։
Աշխատանքների ավարտից հետո բարեկարգված տարածքներն ու ստեղծված ենթակառուցվածքները հանձնվել են ՀՀ կրթության, գիտության, մշակույթի և սպորտի նախարարության «Պահպանության ծառայություն» ՊՈԱԿ-ի տնօրինությանը։
