Վերջին տարիներին Սյունիքում, մասնավորապես, Գորիսում զբոսաշրջության զարգացումն ակնհայտ է։ Այն հիմնականում կապված է Տաթևեր ճոպանուղու, Խնձորեսկի ճոճվող կամրջի, Հին Գորիսի, ինչպես նաև այլ պատմամշակութային հուշարձանների նկատմամբ ունեցած հանրային հետաքրքրությունների հետ։ Միայն Գորիս համայնքում հյուրանոցների, հյուրատների, հյուրընկալող ընտանիքների թիվը հասնում է մի քանի տասնյակի։ Զբոսաշրջային բիզնեսով զբաղվում են ոչ միայն գործարարները, այլև տարբեր բնակավայրերի բնակիչներ, ովքեր զբոսաշրջիկներ հյուրընկալելու համար հարմարություններ են ստեղծում՝ մատուցելով սննդի, տաքսի և սպասարկման այլ ծառայություններ։
Զբոսաշրջության տեմպերի արագ զարգացմանը զուգահեռ, տարեցտարի հյուրերը հարմարավետության ավելի բարձր մակարդակ են ակնկալում ոչ միայն ծառայություն մատուցողներից, մասնավորապես, հյուրանոցային բիզնեսով զբաղվողներից, այլև տեղական ինքնակառավարման մարմիններից՝ համայնքում կեցության, ազատ ժամանցի կազմակերպման, սպասարկման այլ ծառայությունների և ենթակառուցվածքների բարելավման առումով։
Հաշվի առնելով այս հանգամանքները՝ համայնքային բյուջեի եկամուտների աղբյուրների բազմազանության ապահովման խնդիր է առաջանում․ որպես այդպիսին կարող է լինել հյուրանոցային հարկը, որը միջազգային պրակտիկայում վաղուց ընդունված է։
Ավելին այստեղ
