Սյունիքի մարզի Տաթև համայնքի ավագանին մայիսի 18-ին կայացած արտահերթ նիստում որոշում է ընդունել համայնքի 2020թվականի բյուջեի վարչական մասի պահուստային ֆոնդից 637,914 դրամ ծախս կատարելու մասին։ Այն ուղղվել է «նախկին Շինուհայր, Հարժիս և Հալիձոր համայնքների կողմից «Հայջրմուղկոյուղի» ՓԲԸ-ին ունեցած պարտքի մարմանը»։
Անհասկանալի է, ի՞նչ պարտքի մասին է խոսքը, արդյո՞ք բնակիչների, թե՝ նախկին համայնքային ենթակայության հիմնարկների։ Եվ ինչո՞ւ է համայնքների վարչատարածքային փոփոխությունից հինգ տարի անց, ավագանին այժմ նման որոշում ընդունել, մանավանդ, որ Տաթև համայնքի բյուջեից տարեկան մոտ 5-6 մլն դրամ ծախսվում է բնակավայրերում, մասնավորապես Շինուհայրում, Խոտում, Հարժիսում և Հալիձորում, ջրամատակարարումը ապահովող հինգ բանվորների աշխատավարձ վճարելու համար։
Ինչո՞վ է պայմանավորված համայնքի կողմից նման առատաձեռնությունը ջրամատակարարմանը ընկերությանը, որի մասին բազմիցս դժգոհում է համայնքային իշխանությունը։
Սեփ․ լրատվություն
