Lուսանկարը՝ meghrinews.com կայքէջի
Սյունիքի մարզի Մեղրի համայնքի՝ 2019 թվականի փետրվարի 11-ին տեղի ունեցած ավագանու նիստում որոշում է ընդունվել «2019 թվականին օտարման կամ օգտագործման տրամադրման ենթակա հողամասերի ցանկը հաստատելու մասին» հաստատվել է 70 հողամասերի օտարման և 3 օգտագործման տրամադրման հողամասերի տարածքը։
Ըստ ներկայացված ցանկի ակնկալվում էր շուրջ 30.6 հա օտարել, որից ներկայացված մեկնարկային գնի համաձայն համայնքային բյուջե կմուտքագրվեր շուրջ 44 մլն 204 հազար դրամ։ Բայց ըստ համայնքի ղեկավարի որոշումների՝ օտարվել է 29.5 հա հողատարածք՝ 21 մլն 697 հազար դրամով։
Ի տարբերություն այլ համայնքների, Մեղրիում առավել շատ աճուրդի են հանվել գյուղական բնակավայրերի գյուղատնտեսական նշանակության հողեր։
Հատկանշանական է նշել, որ օտարված հողատարածքների չափերը ոչ բոլոր դեպքերում են համընկել ըստ նախապես հաստատված ցանկի։
Օրինակ, Շվանիձոր բնակավայրում նախատեսված էր օտարել երկու հողակտոր՝ 1822.5քառ.մ հասարակական կառուցապատման և 8 հազար քառ․մ գյուղատնտեսական վարելահող, բայց ըստ համայնքի ղեկավար Մխիթար Զաքարյանի որոշումների, աճուրդով օտարվել է 7854.2 քառ․մ և 750 քառ․մ գյուղատնտեսական և 1822.5 քառ․մ հասարակական կառուցապատման հողատարածք։ Նույն խնդիրն առկա է նաև Լեհվազ բնակավայրում, որտեղ օտարվել է մոտ հազար քառակուսի մետրով պակաս հողատարածք, իսկ ազատ մնացած հողատարածքների մասին որևէ տեղեկություն չի հրապարակվել։
Լիճք և Վահրավար բնակավայրերում օտարված հողատարածքները նախնական ցուցակում նույնիսկ ներառված չէին։ 2019թ․ ապրիլի 14-ին Վահրավար բնակավայրում օտարվել է 1,007 հա գյուղատնտեսական նշանակության հող։ Իսկ դեկտեմբերի 23-ին աճուրդի դրված Լիճք բնակավայրի գյուղատնտեսական նշանակության 6 հողակտորը գնել է Ռոլանդ Գևորգյանը՝ շուրջ 8.5 հա-ի համար վճարելով 3 մլն 321 հազար 888 դրամ։
Նման օրինակների հանդիպելուց հետո դժվար է ասել, թե որքանով է Մեղրի համայնքում պահպանվել աճուրդի անցկացման կարգը, առավել ևս, որ Մեղրու համայնքապետարանը մինչ օրս «չի հասցրել» պատասխանել Գորիսի մամուլի ակումբի հունիսի 17-ին ուղարկած հարցմանը, որով անհրաժեշտ էր ստանալ 2019թ․ Մեղրիում տեղի ունեցած աճուրդների արձանագրությունները։
