Գորիսում կայացած հերթական աճուրդում երեք լոտի համար հայտ չէր ներկայացվել

Գորիս համայնքում տեղի ունեցած հերթական աճուրդին ներկայացված 14 հողատարածքներից յոթը գտնվում է Գորիս քաղաքի Կարապետյան փողոցում։ Հասարակական շինություն կառուցելու նպատակով աճուրդով օտարվող 800-ական քառ.մ վեց հողակտորից յուրաքանչյուրի մեկնարկային գին սահմանված էր  մեկ միլիոն 200 հազար դրամ։

Այդ հողերից չորսն օտարվեցին մեկնարկայինից ընդամենը 10% ավելի գնով․ լոտի երկու մասնակիցներից յուրաքանչյուրը կատարեց ընդամենը մեկ քայլ՝ 60 հազար դրամի չափով՝ ընդհանուր հաշվով օտարվող հողակտորի գինը կազմեց 1 միլիոն 132 հազար դրամ։ Մյուս երկու հողերից մեկն օտարվել է  1 միլիոն 360 հազար, իսկ մյուսը՝ 1 միլիոն 380 հազար դրամով։ Վերջին լոտին աճուրդի հայտ էր ներկայացրել 3 մասնակից։ Կարապետյան փողոցից  օտարվել է ևս մեկ հողակտոր 1200քառ․մ մակերոսով՝ 2 մլն 40 հազար դրամով։

Աճուրդի դրված 14 լոտից  երկուսը գտնվում էր գյուղական բնակավայրերում Հարթաշեն գյուղում արտադրական շինություն կառուցելու նպատակով 5630 քառ․մ-ի և Վերիշենի բնակելի տուն կառուցելու  նպատակով 972 քառ․մ  հողատարածքների համար հայտ չէր ներկայացվել։ Հայտ չէր ներկայացվել նաև Գորիս քաղաքի Արզումանյան փողոցի հասարակական կառուցապատման հողերից աճուրդի հանված 2000քառ․մ հողատարածքի համար։

Հասարակական շինություններ կառուցելու համար աճուրդով օտարված հողատարածքներում նախնական տեղեկություններով կկառուցվեն հյուրանոցային տնտեսություններ, բազմաբնակարան շենքեր և սպասարկման ոլորտը զարգացնելու այլ շինություններ։

Գորիս համայնքի ղեկավարի տեղակալ Մենուա Հովսեփյանը, ով աճուրդային հանձնաժողովի նախագահն է, www.mediapoint.am –ին ասաց, որ համայնքային իշխանությունն ակնկալում է, որ հողի նոր սեփականատերերը նորակառույցների միջոցով կնպաստեն քաղաքի տարբեր թաղամասերի համաչափ զարգացմանը։   «Փողոցներ ունենք, որոնք պետք է բարեկարգվեն։ Իսկ դա հնարավոր է իրականացնել շինարարությանը զարկ տալով։ Հիմա մեր առջև խնդիր է դրված ակտիվացնել Կարապետյան փողոցը, որի համար աճուրդի են դրվել հողատարածքները»։

Անահիտ Բաղդասարյան

Լրագրող