«Շահնազար արկածային ճամբար»-ը Գորիսից 15 կմ է հեռու։ Սեփականատերը՝ Ռուզաննան, պատմում է, որ այդ վայրի հետ կապված ավանդույթ կա․Ճամբար տանող ճանապարհի ընթացքում պետք է երազանք պահել, տեղ հասնելով՝ կողքի ալոճի ծառից երեք պտուղ ուտել, որպեսզի երազանքը կատարվի:
Ճամբարը հիմնադրվել է 2020 թվականին ԵՄ-ն զբոսաշրջության զարգացման համար. արկածային տուրիզմի զարգացում պատմական Սյունիքում ծրագրի շրջանակներում և մաս է նույն ծրագրի շրջանակներում ձևավորված լեգենդների արահետում:
Դրամաշնորհի միջոցներով ձեռք են բերել շինարարական նյութեր, նաև սեփական ներդրումներ են կատարել:
Ընտանիքի հայրը՝ Շահնազար պապը, այգեգործությամբ է զբաղվել, և այդ մրգատու այգին է դարձել բիզնեսի հիմքը։ Այն միայն վրաններով գիշերակացի ծառայություն չէ, պարբերաբար արշավներ են կազմակերպվում դեպի Հարթաշեն բնակավայրի պատմամշակութային վայրեր:
Այցելուները հնարավորություն ունեն տաղավարներ վարձակալել, ձիով կամ հեծանիվով շրջել գյուղի տեսարժան վայրերով, զբաղվել ձկնորսությամբ, թռչնադիտարկումներ կատարել, խարույկ վառել…
«Համավարակի և պատերազմի պատճառով շինարարությունն ընդհատվեց, քանի որ մարտական գործողություններին էինք մասնակցում»,-ասում է բիզնեսի բաժնետեր Հովիկ Գրիգորյանը:
Ճամբարում այժմ հոսանքի բացակայության խնդիր ունեն. ներկայումս օգտագործում են ջրատաքացման արևային համակարգ: Հովիկ Գրիգորյանը նշում է, որ աշխատանքներ են իրականացնում հետագայում հոսանք ունենալու համար:
«Շահնազար արկածային ճամբար»-ի միակ խոչընդոտն այն է, որ 4-5 կմ այն կողմում հահառակորդի սահմանն է, այդ պատճառով որոշները խուսափում են այցելել ճամբար:
Սույն հոդվածը հրապարակվել է ԵՄ ֆինանսական աջակցությամբ: Հոդվածը արտացոլում է հեղինակի կարծիքը և պարտադիր չէ, որ արտացոլի ԵՄ տեսակետը։
