Հոկտեմբերի 17-ին Տեղ, Տաթև համայնքներում կայանալիք ՏԻՄ ընտրություններին մասնակցելու հայտ է ներկայացրել վերջերս գրանցված «Ապրելու երկիր» կուսակցությունը; Երկու համայնքում ավագանիների կազմում ընդգրկվել է է 41 թեկնածու։
«Միայն ուժեղ համայնքն է կարողանալու ապահովել կայուն ու զարգացող պետության հեռանկար: Այս տեսլականով է մեր կուսակցությունը մասնակցում ՏԻՄ ընտրություններին՝ պատրաստ տեղերում ստանձնելու կառավարման պատասխանատվությունը», -հայտարարել է կուսակցության համահիմնադիր Մանե Թանդիլյանը:
Տաթևի ընտրությունների ցուցակը գլխավորում է Մարատ Գերասիմյանը, Տեղ համայնքում՝ Արգամ Հովսեփյանը: Երկու թեկնածուներն էլ տեղական ինքնակառավարման մարմիններում աշխատանքի փորձառություն ունեն։
Կուսակցությունն իր նախընտրական ծրագրում երկու համայնքներում առանձնացրել է յուրաքանչյուր բնակավայրի համար նախատեսվող աշխատանքային ուղղություններ։ «Չնայած համայնքները տարբեր են, բայց ունեն նմանատիպ խնդիրներ՝ լուծման համանման եղանակներով:
Մենք կարևորում ենք ոչ միայն տարբեր համայնքներում թիմային մասնակցությունը, այլև համագործակցաբար այդ խնդիրների լուծումը»,-նշել է կուսակցության համահիմնադիր Մեսրոպ Առաքելյանը։ 
«Ապրելու երկիր» կուսակցությունը կարևորում է այնպիսի մեխանիզմների մշակումը, որով համայնքներն ի զորու կլինեն բարձրացնել իրենց ֆինանսական ինքնուրույնությունն ու ներգրավել համայնքի զարգացմանն ուղղված ներդրումներ:
Հաշվի առնելով, որ Տեղն այլևս սահմանամերձ համայնք է, կուսակցությունը հայտարարել է, որ «Պատրաստ ենք լինելու այնպիսի միջոցներ ձեռնարկել, որոնք վստահություն կտան տվյալ բնակավայրի բնակիչներին համայնքի հնարավորության սահմաններում պաշտպանվածության աստիճան ունենալ: Անվտանգության ապահովման հարցը պետական կառավարման հարց է, բայց մինևնույն ժամանակ տեղում կազմակերպական բազմաթիվ հարցեր կան, որոնք համայնքը կարող է ստանձնել ու պետք է ստանձնի»։
