«Մարդը կարիքի մեջ» կազմակերպության հայաստանյան ներկայացուցչությունն (ՄԿՄ) Եվրամիության ֆինանսական աջակցությամբ իրականացվող «Աջակցություն ՀՀ-ում շրջանակաձև միգրացիային և վերաինտեգրման գործընթացներին» ծրագրի շրջանակներում հայտարարում են «Ճամպրուկ» միգրացիոն հիմնախնդիրների վերաբերյալ լրագրողական ամենամյա մրցույթ:
Մրցույթը նպատակ ունի միավորել Երևանի և մարզերի ԶԼՄ-ների ներկայացուցիչների ներուժը միգրացիոն հիմնախնդիրների լուսաբանման շուրջ և խրախուսել ոլորտի հիմնահարցերը բարձրաձայնող լրագրողներին: Մրցույթին կարող են մասնակցել Երևանի և ՀՀ բոլոր մարզերի լրատվամիջոցների ներկայացուցիչներն ու անկախ լրագրողները: Մասնակցության համար անհրաժեշտ է ներկայացնել միգրացիոն թեմաներով պատրաստած հեռուստահաղորդումներ, ռադիոհաղորդումներ, մամուլի հրապարակումներ և ինտերնետային պարբերականներում ներկայացված հոդվածներ:
Ոլորտի մասնագետներից և լրագրող-փորձագետներից կազմված ժյուրին երեք` լավագույն հեռուստահաղորդում, լավագույն ռադիոհաղորդում, լավագույն հոդված անվանակարգերում կընտրի մեկական մրցանակակիր: Յուրաքանչյուր անվանակարգում կհանձնվեն նաև վկայականներ և դրամական պարգևներ:
1-ին տեղ`180 000 դրամ,
2-րդ տեղ` 90 000 դրամ,
3-րդ տեղ` 45 000 դրամ:
Ընտրության չափանիշներն են`
- Հոդվածները, հեռուստա և ռադիոհաղորդումները պետք է հրատարակված կամ հեռարձակված լինեն 2013 թվականի հունվարի 1-ից մինչև 2013 թվականի հոկտեմբերի 31-ը ընկած ժամանակահատվածում:
- Նյութի բովանդակությունը պետք է լինի հանրությանը մատչելի:
- Նյութերում պետք է պահպանված լինեն լրագրողական էթիկան և հեղինակային մոտեցումը:
- Ընտրված թեման պետք է լինի սպառիչ և հարցի շուրջ պարունակի համակողմանի տեղեկատվություն:
Յուրաքանչյուր լրագրող կարող է ներկայացնել մեկից ավելի լրագրողական նյութ: Նյութերը կարող են լինել հայերեն և ռուսերեն լեզուներով:
Մասնակցության համար անհրաժեշտ է լրացնել կից ներկայացված դիմում-հայտի ձևը և այն նյութի հետ ներկայացնել «Մարդը կարիքի մեջ» կազմակերպության հայաստանյան ներկայացուցչություն (հասցե` ք. Երևան, Բաղրամյան 2, բն 5): Հայտի ձևը կարող եք գտնել նաև www.migrant.am ինտերնետային կայքում:
Տպագիր մամուլում կամ ինտերնետ պարբերականներում տեղադրված նյութերը կարող եք ուղարկել էլեկտրոնային տարբերակով հետևյալ էլ. փոստի հասցեով` liana_gyozalyan@mail.ru.
Դիմում հայտերի ընդունման վերջնաժամկետը 2013 թվականի նոյեմբերի 1-ն է (մինչև ժամը 18:00-ը):
Միգրացիոն հիմնախնդիրների վերաբերյալ “ՃԱՄՊՐՈՒԿ” լրագրողական մրցանակաբաշխությունը նվիրված է Միգրանտների միջազգային օրվան, որը ամեն տարի նշվում է դեկտեմբերի 18-ին:
Լրացուցիչ տեղեկությունների կամ հարցերի համար զանգահարել`
093 347 077, 010 56-25-73 հեռախոսահամարներով:
