Այսօր Գորիսում բացվեց Popock Goris-ը, որը Հայաստանում Պոպոք անվամբ հյուրանոցային ցանցի 7-րդ մասնաճյուղն է։
-Ցանցն ընդլայնելու մասին միշտ մտածել ենք ու ցանկացել, բայց պատերազմից հետո այն բացելու առաջնային նպատակը ոգեշնչելն էր ու ժողովրդի մեջ խաղաղության հույսն արթուն պահելը,- ասում է հյուրանոցային ցանցի հիմնադիր Բակուր Մելքոնյանի կինը՝ Գայանե Մարգարյանը։
-Չունեինք մտածմունքներ, մտքեր և ոչ մի վայրկյան, ոչ գնելուց, ոչ դրանից հետո, ոչ էլ առավել ևս հիմա, որ գուցե սխալ էր, վաղ էր կամ նման բաներ։ Մենք նպատակ ունեինք, ապացուցելու ու ցույց տալու, որ Գորիսը պետք է ապրի, պետք է զարգանա։ Կարծիքներ, վախեր շատ էինք լսում մյուսներից՝ տեղացիներից, դրսի հայերից։ Բայց մենք երբեք չենք կասկածել, որ ճիշտ ենք անում։ Ու բոլոր հոռետեսական մտքերին գործով ցանկացանք պատասխանել։ Բիզնեսը կաշխատի թե չէ, դա երկրորդ հարցն է, եկամտաբեր կլինի թե չէ, դրա մասին քիչ ենք մտածում։ Այն, որ այս շենքը հավատ կարող է ներշնչել, դա է կարևոր։ Ամուսնուս՝ Բակուր Մելքոնյանին շատերն են ճանաչում, նա նաև «Արտ լանչ» ընկերության հիմնադիրն է, որը պատերազմի օրերին զորամասերին սննդով էր ապահովում։ Նա հաճախ է սոցցանցում գրառումներ կատարում, մոտ 15 հազար հետևորդ ունի, և վստահ եմ, որ շատերը կներշնչվեն, ներդրումներ կանեն Գորիսում, աշխատատեղեր կբացվեն,- նշում է Գայանեն։
«Պոպոք» հյուրանոցային ցանցի ղեկավար Կարինե Մինասյանի խոսքով առայժմ տասը հոգանոց անձնակազմ կաշխատի՝ հիմնականում տեղացիներ։ Չեն բացառում, որ ծանրաբեռնվածության դեպքում աշխատատեղերը կավելանան։
Աշխատողների ընտրության կարևոր սկզբունքը «Պոպոք»-ում արագ կողմնորոշվելու կարողությունն է, ադմինիստրատիվ աշխատանքների դեպքում՝ նաև օտար լեզուների իմացությունը։
«Պոպոք Գորիսը» հյուրեր կարող է ընդունել արդեն դեկտեմբերի սկզբից։ Այն մատուցում է հիմնականում գիշերակացի ու հանրային սննդի ծառայություններ։
Հ․Գ․ Բակուր Մելքոնյանին հնարավոր չեղավ «կտրել» հյուրերից և լսել նրա կարծիքը, բայց նկատելի էր, թե ինչպիսի ոգևորությամբ է ներկաներին պատմում իր նախաձեռնության մասին։
