TCF ընկերությունը շարունակում է իր սոցիալ-կրթական ծրագրերը մարզերում։ Այս անգամ ընկերությունը հանդես է եկել նոր նախաձեռնությամբ, որի նպատակն է հասանելի դարձնել ոչ գեղարվեստական ժանրի՝ ժամանակակից լավագույն գրքերը մարզերում։ TCF-ցիները՝ հանուն ուժեղ մարզերի և համայնքային զարգացման նախաձեռնության մեկնարկը Սիսիանում էր։ Տեղի ավագ դպրոցում բացվել է ընթերցանության անկյուն՝ հարմարավետ կահավորանքով, այն համալրվել է մոտիվացնող, կենսագրական կամ մարքեթինգին ու բիզնեսին վերաբերող գրքերով։
«Նախաձեռնության նպատակն է մարզերի երիտասարդներին հասանելի դարձնել գրքեր, որոնք կնպաստնեն նրանց անձնային աճին, կօգնեն ծանոթանալ ժամանակակից մասնագիտություններին, կմոտիվացնեն և կօգնեն կողմնորոշվել կյանքում», – ասում է TCF ընկերության կառավարման խորհրդի անդամ Մարիամ Համբարձումյանը։
Ծրագիրը լինելու է շարունակական, այն կանցկացվի ամեն տարի՝ Գիրք նվիրելու օրվա կապակցությամբ։ Ընկերությունը կընտրի սահմանամերձ համայնքների դպրոցներից մեկը, կֆինանսավորի գրքասերների անկյան կահավորումն ու կապահովի անհրաժեշտ գրականությամբ։
«Հատկապես, 44-օրյա պատերազմից հետո փորձում ենք օգտագործել ամեն հնարավորություն մարզային համայնքներին օգտակար լինելու համար, կիսվել գիտելիքով, ոգևորել երիտասարդներին ու ցույց տալ, որ հնարավոր է մնալ Հայաստանում, ապրել մեր մարզային համայնքներում և նույնքան հաջողակ լինել, որքան, օրինակ՝ Երևանում աշխատող մասնագետներն են»,- ասում է TCF ընկերության կառավարման խորհրդի անդամ Մարիամ Համբարձումյանը։
TCF ընկերությունը անցած տարվա ընթացքում նախաձեռնել և իրականացրել է մարքեթինգի և բիզնեսի ոլորտի 2 կարևոր միջոցառումներ։
Ապրիլին ընկերությունն, իր ծննդյան տոնի առթիվ, կազմակերպել էր «Ֆորմուլա Գորիսը», որի շնորհիվ Սյունիքի և Արցախի երիտասարդները հնարավորություն ստացան ծանոթանալու հեռավար աշխատելու հնարավորություններին, ստանալու գիտելիքներ հաղորդակցության, մարքեթինգի և տեղեկատվական տեխնոլոգիաների ոլորտներից։
Իսկ դրանից հետո՝ հուլիսին, մի քանի տեխնոլոգիական ընկերությունների հետ միասին TCF-ը կազմակերպել էր Արցախի տեխնոլոգիական շաբաթը (Artsakh tech week)։
Մարիամ Համբարձումյանի խոսքով՝ այս միջոցառումներից հետո ավելի պարզ դարձավ, թե ինչքան ներուժ կա մարզերում և ինչ հաջողություններ կարող ենք գրանցել, եթե մարզերի երիտասարդներին հասանելի դառնա որակյալ կրթությունը։
