«Պետական նպաստների մասին» ՀՀ օրենքի 20-րդ հոդվածի համաձայն նպաստառու ընտանիքների առաջին դասարանցի յուրաքանչյուր երեխայի համար պետական բյուջեից 25 հազարական դրամ է նախատեսվում։ Միասնական սոցիալական ծառայության Գորիսի տարածքային կենտրոնի սոցիալական աշխատանքի և զբաղվածության ծրագրերի բաժնի պետ Նունե Ղուկասյանը նշում է, որ 2022-23թթ․ ուսումնական տարվա համար դեռևս երեք դիմում է ներկայացվել՝ նախորդ տարվա 112-ի փոխարեն։
Հրատապ օգնություն ստանալու համար ընտանիքի չափահաս անդամներից մեկը երեխայի` առաջին դասարան ընդունվելու տարվա` օգոստոս, սեպտեմբեր, հոկտեմբեր ամիսների ընթացքում տարածքային կենտրոն պետք է ներկայացնի առաջին դասարան հաճախելու մասին տեղեկանք։ Առաջին դասարան ընդունվելու միանվագ հրատապ օգնություն կարող է ստանալ ամսվա դրությամբ ընտանեկան նպաստի իրավունք ունեցող այն ընտանիքը, որի անչափահաս անդամներից մեկն ընդունվել է հանրակրթական ուսումնական հաստատության առաջին դասարան։ Նպաստը նշանակվում է առաջին դասարան ընդունվող յուրաքանչյուր երեխայի համար։ Վճարվումը կատարվում է դիմելու ամսվա հաջորդող ամսվա ընթացքում:
Բաժնի պետը նաև նշում է, որ դպրոցահասակ երեխաներ ունեցող նպաստառուները կենտրոնից կարող են տեղեկանք ստանալ՝ դասագրքերի զեղչի համար։
