Կայացավ Հայաստանի ամերիկյան համալսարանի և Գորիսի կենտրոնական գրադարանի համագործակցությամբ ստեղծված «Ժամանակակից գրադարանի գործարկման» մեկնարկը։
«Մոտ մեկ տարի է, ինչ մենք աշխատում ենք և մեր մտահաղացումն այն էր, թե ինչպես անել, որ գրադարանն ակտիվ լինի և ծառայի համայնքին»,-ասաց ՀԱՀ Փափազյան գրադարանի տնօրեն Սաթենիկ Ավագյանը։
Գրադարանում առկա են տարբեր լեզուներով գրքեր։ «Մեր նպատակը համայնքային ենթակայության գրադարանների հետ համագործակցությունը, հզորացումն ու զարգացումն է և մենք ցանկանում ենք այս գրադարանում կենտրոնացնել քաղաքի տարբեր գրադարաններում առկա գրքերի ֆոնդը»,-ասում է Սաթենիկ Ավագյանը։ Գրքերի ֆոնդի հիման վրա ստեղծվել է Գորիսի գրադարանի կայքէջը՝ goirislibrary.am, որտեղ որոնման միջոցով ընթերցողը կարող է պարզել, թե իրեն հետաքրքրող գիրքը Գորիսի որ գրադարանից կարող է գտնել։ Ամերիկյան համալսարանի գրադարանավար Արազ Մարկոսյանը ներկայացրեց, թե ինչպես ընթերցողները կարող են մուտք գործել համակարգ և որոնումներ կատարել։ Էլեկտրոնային գրադարանի առավելություններից մեկն այն է, որ ընդլայնվում են ընթերցողների հնարավորությունները, այսինքն ընթերցողները չեն սահմանափակվի միայն Գորիսի գրադարանների գրացանկով, կայքում տեղադրված են նաև Ազգային և Հայաստանի տարբեր գրադարանների գրացուցակները․ ընթերցողը գրադարանների ցանկում կարող է գտնել այն, ինչ փնտրում է։ Գրքերի որոնումը ԿՈՀԱ համակարգի միջոցով է կատարվում, այն գրադարանային բոլոր գործընթացների բաց կոդով ծրագրային ապահովում է, որից օգտվում են աշխարհի խոշորագույն գրադարանները, այդ թվում նաև Հայաստանի ազգային գրադարանը: ԿՈՀԱ ծրագրային ապահովումը կարող է օգտագործել ինչպես առանձին անկախ գրադարանը, այնպես էլ՝ գրադարանների միավորված խումբը, որ նախընտրել է ստեղծել միասնական քարտարան։ Ծրագրի շնորհիվ միավորված գրադարանների ընթերցողները կարող են փնտրել եւ գտնել իրենց նախընտրած նյութը, պատվիրել առցանց:
