Գորիս համայնքի ավագանու հինգերորդ գումարման վերջին նիստում լսվեց համայնքապետարանի աշխատակազմի ֆինանսատնտեսական և եկամուտների հավաքագրման բաժնի պետ Նարեկ Մնացականյանի հաշվետվությունը՝ համայնքի 2023 թվականի բյուջեի կատարման առաջին եռամսյակի ընթացքի մասին։ Ըստ բանախոսի, ընթացիկ տարվա բյուջեի սեփական եկամուտները, որը կազմում է 248 միլիոն դրամ, հավաքագրվել է 28,6 տոկոսով, ծախսերը՝ պլանավորված 282 միլիոն դրամի 27 տոկոսով։ Վերջին ցուցանիշը նախորդ տարվա նույն ժամանակաշրջանի համեմատ ավելի է, քանի որ, ըստ բաժնի պետի, համայնքի 2023թ․ տարվա բյուջեով մոտ հարյուր միլիոնով ավելացել է համայնքային ենթակայության նախակրթարանների ֆինանսավորումը։ Այն ուղղվել է աշխատավարձերի բարձրացմանը, նաև համայնքում ավելացել է նախակրթարան հաճախող երեխաների թիվը։
Բյուջեի հաշվետվության քննարկման ընթացքում առաջարկություններ եղան, մասնավորապես անշարժ գույքի, հողի հարկի եկամուտների ապառքների հարցում զեղչերի կիրառման մասին, որին ի պատասխան նշվեց, որ այդ գործառույթը ավագանու որոշման տիրույթում չէ, նաև մտահոգություն հայտնվեց, որ այդ գործելակերպով խտրական վերաբերմունք կդրսևորվի այսպես ասած՝ պարտաճանաչ վճարողների և շարունակական պարտքեր կուտակողների միջև։
Քննարկվեց նաև համայնքում աղբահանության գանձման թվայնացմանը, Գորիս համայնքի կոմունալ ծառայության ֆինանսական կառավարմանն առնչվող հարցեր։ Համայնքի ընթացիկ տարվա բյուջեով աղբահանության կազմակերպման համար նախատեսված է 78 միլիոն 600 հազար դրամ, որից տարեկան հավաքագրվում է մոտ 52 միլիոնը։
Համայնքի ղեկավար Առուշ Առուշանյանի խոսքով նախորդ տարիների համեմատ, համայնքում երեք անգամ ավելացել են աղբահանության գանձման գումարները, այն դեպքում, երբ մեկ շնչի հաշվարկով աղբահանության վճարը Գորիսում անհամեմատ ցածր է, քան հանրապետության այլ համայնքներում։ «Այնուամենայնիվ, մեր նպատակն է, որպեսզի կառավարման հմտությունների, տնտեսավարման բարելավման շնորհիվ հասնել նրան, որ աղբահանություն իրականացնող ընկերությունն աշխատի շահույթով»,-նշեց Առուշ Առուշանյանը։
Ավագանին քննարկեց նաև այլ հարցեր։ Հաջորդ նիստը կկայանա օգոստոսին։
