ՀՀ փոխվարչապետ, տարածքային կառավարման նախարար Արմեն Գևորգյանն այսօր ընդունել է ԵԱՀԿ երևանյան գրասենյակի ղեկավար, դեսպան Անդրեյ Սորոկինին: Դեսպանը տեղեկացրել է, որ նոյեմբերի 11-13-ը ԵԱՀԿ-ն Սյունիքում կկազմակերպի մարզի ներդրումային համաժողով, որի նպատակն է՝ ներկայացնել մարզի տնտեսության ոչ լեռնահանքային հատվածի ներդրումային հնարավորությունները: Այս ասին հայտնում են ՏԿՆ հասարակայնության հետ կապերի բաժնից:
Սա նման համաժողովի անցկացման առաջին փորձն է, և կազմակերպիչները լիահույս են, որ նոր ներդրումները կօգնեն դիվերսիֆիկացնել մարզի տնտեսությունը՝ ստեղծելով նոր աշխատատեղեր և եկամտի աղբյուրներ: Համաժողովին կմասնակցի նաև ԵԱՀԿ փորձագետը, ով Սյունիքի մարզի համար մշակելու է տնտեսական զարգացման փորձնական մոդելի տեխնիկական բնութագիրը: Հրավիրված են Հայաստանում հավատարմագրված դիվանագետներ, դոնոր կազմակերպությունների ներկայացուցիչներ, գործարարներ, ներդրողներ: Դեսպանը նաև փոխվարչապետին հրավիրեց մասնակցել համաժողովի բացմանը: Գևորգյանը ողջունելի է համարել նախաձեռնությունը`առաջարկելով զարգացման մոդելի մշակման աշխատանքներում ներգրավել նաև շահագրգիռ նախարարությունների ներկայացուցիչների, ինչպես նաև՝ դիտարկել օրինակելի մոդել մշակելու տարբերակը, որը հնարավոր կլինի հիմք ընդունել բոլոր մարզերի համար:Նա նաև պատրաստակամություն է հայտնել մասնակցել համաժողովի աշխատանքներին:
tert.am
