Մարիամ Մաթևոսյան
Տեղեկատվական տեխնոլոգիաները շարունակում են մեծ թափով նորանոր տիրույթներ ընդգրկել իրենց մեջ` կլանելով մարդուն: Զարգացման բարձրակետերից այն, որ ինտերնետային աշխարհում գրքերն արդեն խոսում են: Հովհաննես Թումանյանն ի՞նչ իմանար, որ իր հեքիաթներն այսօր ոչ թե ձեռքից ձեռք են ընկնում, այլ share կոճակով աշխարհից աշխարհ են տարածվում:
ՏՏ-ի նոր գործիք է աուդիո հարթակը: Նոր օնլայն տիրույթ, որը գրավում է ընթերցասերներին, նաև նրանց, ովքեր սիրում են ոչ թե գիրք կարդալ, այլ` լսել: Ուղղակի սեղմելով play կոճակը` լսում ես Հվ. Թումանյանի «Բարեկենդան», «Կացին ախպեր» հեքիաթները, Պարույր Սևակի բանաստեղծությունները, Գրիգոր Նարեկացու «Մատյան ողբերգությունը» և այլն:
Նոր տիրույթում իր փոքրիկ նախաձեռնությամբ է հանդես գալիս նաև «Ինստիգեյթ» ՓԲԸ-ն: Ընկերությունը կարևորելով էլեկտրոնային համակարգերի կատարելագործումը, որոնց միջոցով կարող ես նաև նոր շունչ տալ հայ մշակույթին ու գրականությանը, սկսել է ձայնագրել հայ դասականների ստեղծագործությունները, որը կրում է ուսումնադաստիարակչական բնույթ: «Գաղափարը առողջ է. ստեղծվել է մի գործիք, որն օգտագործվելով ընթերցողի կողմից` վերածվում է էլեկտրոնային գրքի: Այն ոչ միայն կարող ես լսել, այլև կարդալ,- ասում է ընկերության աշխատակից Արտուր Խոջաբաղյանը ու հավելում, որ էլեկտրոնային գրադարանը ստեղծվում է տեքստային և ձայնային թվայնացմամբ»:
Նախաձեռնողների աջակցությամբ վերջերս Ակսել Բակունցի «Ծիրանի փող»-ն ու գորիսյան բարբառով գրված «Խորամանկ կինը» գրքերը ևս «սկսել են խոսել»: Տեքստը կարդացել են գորիսեցի դերասաններ Սեյրան Մկրտչյանը, Էրիկ Գրիգորյանը և Թեհմինե Աբրահամյանը:
Գաղափարակիրների առջև խնդիր է դրված նաև բարբառների պահպանության հարցը: Ձայնագրվել են ոչ միայն Զանգեզուրի, այլև Գյումրվա, Արցախի բարբառային գործեր:
«Սփյուռքահայերի համար ևս ուսուցողական կլինի, քանի որ կարդալն ու լսելը ավելի կամրապնդի հայերենի իմացությունը կամ կօգնի հայերենը հեշտ սովորել»,-շարունակեց զրուցակիցս:
Շատերն իրենց մտահոգություն են հայտնել, որ աուդիո գրքերն ավելի կարժեզրկեն գիրքը, բայց այդ կարցիքին չէր Ա. Խոջաբաղյանը. «Ինֆորմացիան մնում է ինֆորմացիա, գրքից ստանաս թե համացանցից: Վիրտուլ աշխարհի վնասները սոցիալական ցանցերն են ու խաղերը, սա նոր միջոց է գիտելիք ձեռք բերելու համար»,-ավելացրեց նա:
