Ասում են՝ հարուստ են այն բնակավայրերը, որոնք ունեն կյանքով լեցուն մեծահասակներ և համայնքի մասին մտածող երիտասարդներ։
Կարող ենք փաստել, որ Գորիս համայնքի Ակներ բնակավայրը հենց այդպիսինների շարքին է պատկանում։ Չնայած նրան, որ բնակավայրը գտնվում է սահմանին շատ մոտ, այնուամենայնիվ այստեղ մարդիկ փորձում են մի կողմ դնել անվտանգային խնդիրներն, ու թշնամու հորիզոնի տակ անգամ ցույց տալ հայի անկոտրում և ուժեղ տեսակը։
Ակներցի մեծահասակները տարիներ շարունակ պետությունից և այլ պատկան մարմիններից ակնկալում էին մեծահասակների համար ժամանցային վայրի կառուցում, որն սակայն տարիներ շարունակ ոչ միայն չի կատարվել ,այլև մոռացության է մատնվել։
Ակներցիները միահամուռ, հայի տեսակին հատուկ նվիրումով դեռ նախորդ տարի որոշեցին իրենց անձնական միջոցներով իրականություն դարձնել վաղեմի ցանկությունը, և կառուցել մեծահասակների և երիտասարդների համար նախատեսված անկյուն։
Հայրենանվեր այս նախաձեռնությանը հետագայում միացան նաև ռուսաստանաբնակ ակներցիները, երիտասարդներն ու գյուղի մյուս մեծահասակները:
Դեռ նախորդ տարի տեղի ունեցած այս փոփոխությունը փոխեց մեծահասակների շրջանում տրամադրությունները: Այժմ նրանք ունեն ճիշտ է փոքրիկ, բայց բոլորին մեկ հարկի տակ համախմբող տանիք, ուր ամեն օր հավաքվում և իրենց ժամանցն են անցկացնում:
Երիտասարդները որոշեցին վավերագրել նրանց մասին պատմող հուշ-պատմությունները, ներկայացնել այնտեղ տեղի ունեցող սերունդների երկխոսությունը` երիտասարդների և մեծահասակների միջև:
