Ավետ Դիշունց
Արդեն մի քանի տարի է Հանրային հեռուստատեսության եթերը զարդարում է «Հայ ասպետ» հեռուստախաղը: Այս ինտելեկտուալ մարզախաղը ճանապարհ է բացում հայ գիտակ պատանիների համար դեպի իմացութան և ինքնաճանաչողության գագաթները, միավորում է Հայաստանի մարզերում բնակվող հարյուրավոր պատանիների և նրանց միջոցով կրթում նաև բազմաթիվ հեռուստադիտողների: Օրեր առաջ ավարտվեց «Հայ Ասպետ» ինտելեկտուալ խաղ-մրցույթի եզրափակիչը: Սյունիքի մարզի Խնձորեսկ համայնքի դպրոցականները մրցում էին Նոյեմբերյանի թիվ 2 դպրոցի և Լոռու մարզի Մեծավան գյուղի դպրոցի սաների հետ: «Խնձորեսկի թիմը ցուցադրեց հիանալի և գեղեցիկ խաղ»-շնորհավորանքի իրենց խոսքերում նշեցին նաև խաղի կազմակերպիչներն ու ժյուրիի անդամները, ինչի վկայությունն էր նաև «Հայ ասպետ» վաստակելը:
Այս հաղթանակը թիմային հաղթանակն է. ուսուցիչների հաղթանակն է, ովքեր ջանք ու եռանդ չխնայեցին` իրենց գիտելիքները ԱՍՊԵՏԱԿԱՆՆԵՐԻՆ փոխանցել, դպրոցի հաղթանակն է, մեր բոլորիս հազթանակն է: Խիստ լարված և հավասար պայքարում բոլոր երեք թիմերը աչքի ընկան փայլուն գիտելիքներով՝ հավաքելով 67-ական միավոր : Եզրափակչում «Լավագույն» ճանաչվող, հաղթող թիմի անդամները, որպես հաղթող ասպետականներ, այցելում են Արևմտյան Հայաստան: Եվ քանի որ բոլոր երեք թիմերը վաստակեցին հավասար միավորներ, խաղի կազմակերպիչները բոլոր թիմերին ճանաչեցին «Լավագույն» և երեք թիմերին արժանացրին ոսկե մեդալների և ոսկե գավաթի:
Ամռանը թիմերը կայցելեն Արևմտյան Հայաստան մեր պապերի երկիր: Իսկ մինչ այդ, նրանք կմասնակցեն Երևանում կայանալիք «Հայ Ասպետ» հեռուստախաղի կողմից կազմակերպվող Ամանորյա դիմակահանդեսին : Շնորհավորում ենք Խնձորեսկի դպրոցի ԱՍՊԵՏ-ներին, դպրոցի ուսուցիչներին, տնօրինությանը, «Հայ Ասպետ»-2013-ին Ոսկե Մեդալի և Ոսկե Գավաթի արժանանալու համար:
