Անահիտ Բաղդասարյան
Սյունիքի մարզի ընդհանուր իրավասության առաջին ատյանի դատարանի Գորիսի նստավայրում մարտի 18-ին եւ 19-ին շարունակվեց Գրիգոր Պապյանի սպանության գործով Գեւորգ, Կարապետ, Ջորջ Թոսունյանների հոր՝ Հակոբ Թոսունյանի դեմ հարուցված քրեական գործի դատաքննությունը: Ամբաստանյալ Հակոբ Թոսունյանը մեղադրվում է նրանում, որ 2010թ. օգոստոսի 28-ին Քաջարանում Գրիգոր Պապյանին սպանության գործով որպես վկա Նոնա Սպարտակի Հարությունյանի և նրա որդու առողջությանը ծանր վնաս պատճառելու սպառնալիքով հարկադրել է կեղծ ցուցմունք տալ և օժանդակել է առանձին պաշտոնատար անձանց՝ առանձնապես ծանր հանցագործության վերաբերյալ քննվող քրեական գործով կեղծ ապացույց ստեղծելուն:Դատական նիստին որպես ամբաստանյալներ ներկա էին նաև ՀՀ ոստիկանության Սյունիքի մարզային վարչության Կապանի բաժնի պետի օպերատիվ գծով տեղակալ Գագիկ Դանիելյանը, ՀՀ ոստիկանության ՔԳՎ Սյունիքի մարզի քննչական բաժնի քննիչ Արման Ենգոյանը և Սյունիքի մարզի դատախազի տեղակալ Էդիկ Հովսեփյանը, ովքեր մեղադրվում էին Գրիգոր Պապյանի սպանության գործով ապացույցներ կեղծելու մեջ:
Դատարանը լսեց վկաներ Միհրան Գրիգորյանին և Անդրանիկ Սաֆարյանին, որոնց տված ցուցմունքները չէին համապատասխանում նախաքննության ընթացքում տված ցուցմունքներին:
Նոնա Հարությունյանի նախկին ամուսնու՝ Անդրանիկ Սաֆարյանի` դատաքննության ընթացքում տված ցուցմունքը հակասում էր նախաքննության ընթացքում տված 2 ցուցմունքներին: Դատախազ Արման Հակոբյանի միջնորդությամբ հրապարակվեց նախաքննության ընթացքում Ա. Սաֆարյանի տված ցուցմունքը: «Թե ինչու չէր պատմում այն, ինչ գրել է նախորդ երկու ցուցմունքներում» դատախազի հարցին վկան պատասխանեց, որ չէր հիշում:
Դատավոր Դավիթ Գրիգորյանը նաև հարցրեց, թե դատական նիստում հրապարակված ցուցմունքներից որը կարող է դատարանը հիմք ընդունել, վկա Ա. Սաֆարյանը պատասխանեց` վերջինը:
Հ. Թոսունյանի պաշտպան Վահագն Մանուկյանը հայտարարեց, որ ապացույցների գնահատման շրջանակներում պետք է հաշվի առնվեն նաև վկա Անդրանիկ Սաֆարյանի սկզբնական ցուցմունքները, քանի որ կատարվածի վերաբերյալ պակաս կարևոր չի նաև վկայի առաջին խոսքը: Քանի որ աշխատանքային օրն ավարտվել էր, դատարանը չհասցրեց լսել վերջին վկային՝ Գարիկ Կոստանյանին:
Մարտի 19-ի դատական նիստին դատարանը պետք է լսեր ևս 4 վկայի, սակայն ներկայացել էին երկուսը՝ Մարինե Հայրապետյանն ու Սևակ Սաֆարյանը: Վկա Մարինե Սաֆարյանի տված ցուցմունքը չէր համապատասխանում նախաքնությանն փուլում նրա տված ցուցմունքին, որը դատախազ Ա. Մանուկյանի միջնորդությամբ հրապարակվեց: Իսկ թե ինչու չէր համապատասխանում, Մ. Սաֆարյանը պարզաբանեց, որ տարիներ են անցել և լավ չէր հիշում: Նախաքննության ընթացքում ինքն է գրել ցուցմունքը, ոչ ոք չի թելադրել: Մարինեն դատարանին հայտնեց, որ, ճանաչելով Նոնա Հարությունյանին, չի հավատում, որ Հակոբը կամ Գարիկը սպառնացել են նրան:
«Նման հակասական և ոչ արժանահավատ ցուցմունքների արդյունքում ես արդեն մեկ տարի յոթ ամիս գտնվում եմ անազատության մեջ: Ես համոզված եմ, որ չկա որևէ հիմնավոր փաստ ինձ մեղադրելու համար, և մենք դրանում համոզվում ենք այս և այլ դատական նիստերում»,- հայտարարությամբ հանդես եկավ ամբաստանյալ Հակոբ Թոսունյանը:
Հաջորդ դատական նիստը նշանակվեց ապրիլի 2-ին:
hetq.am
