Տեմպուսի ASPIRE ծրագրի շրջանակներում (Հատուկ կարիքներով մարդկանց հասանելիությունը հասարակությանը) 2014թ. ապրիլի 30-ին Գորիսի պետական համալսարանի նախաձեռնությամբ Սյունիքում կազմակերպվեցին Հաշմանդամություն ունեցող անձանց կրթության իրավունքների Ազգային իրազեկման օրվան նվիրված միջոցառումներ, որոնց կարգախոսն էր «Կրթություն բոլորի համար. հավասար իրավունքներ, հավասար հնարավորություններ»:
Ակցիայի նպատակն էր բարձրացնել հանրային իրազեկությունը հաշմանդամություն ունեցող երիտասարդների բարձրագույն կրթության և աշխատանք ունենալու իրավունքների վերաբերյալ, և նպաստել երրորդային մակարդակում ներառական կրթության ներմուծմանը:Իրազեկության բարձրացման միջոցառումնեը մեկնարկեցին Գորիսի պետական համալսարանում, որտեղ հրավիրվել էին նաև Գորիսի տարբեր ուսումնական հաստատությունների ներկայացուցիչներ, ԶԼՄ-ներ. ՀԿ-ներ:
Ներառական կրթության մասին զեկույցներով հանդես եկան համալսարանի փորձագետներ, այնուհետև ուսանողական շարժական խմբերը մեկնեցին տարբեր ուղղություններով` Սիսիան,Կապան քաղաքների դպրոցներ, ինչպես նաև այցելեցին Գորիսի մի քանի դպրոցներ`աշակերտներին իրազեկելու հաշմանդամության խնդիրներ ունեցող անձանց կրթական իրավունքների մասին՝հանդիպումների մասնակիցներին տրամադրելով պաստառներ, բուկլետներ:
Իրազեկման օրվա շրջանակներում վերջին կանգառը Գորիսի մամուլի ակումբում էր, որտեղ Գորիսի պետական համալսարանի ռեկտոր Յուրա Սաֆարյանը նշեց ,որ նախաձեռնության նպատակն է աջակցել առանձնահատուկ կարիք ունեցող անհատների կրթական իրավունքի մատչելիությանը և առօրյա հասարակական կյանքին նրանց ինտեգրմանը, պայքարել առանձնահատուկ կարիք ունեցող անհատների նկատմամբ կիրառվող խտրականության դեմ` Բոլոնիայի գործընթացին և ՄԱԿ-Ի Հաշմանդամների իրավունքների մասին կոնվենցիային համապատասխան, արմատավորել հասարակության մեջ իրազեկվածություն և հանդուրժողականություն:
Հանդիպման ընթացքում քննարկվեցին, թե ինչ քայլեր պետք է ձեռնարկվեն հաշմանդամություն ունեցող մարդկանց կրթության համակարգ ներգրավելու համար:
Վերջին մեկ տարում Գորիսի մամուլի ակումբը ևս անդրադարձել է հաշմանդամություն ունեցող երեխաների կրթության իրավունքի պաշտպանությանը. պատրաստվել են տասանյութեր, կազմակերպվել քննարկումներ:
