Սյունիքի մարզում, Իրանի հետ սահմանի վրա, նախատեսվում է Ազատ տնտեսական գոտու ստեղծում: Ծրագրի արժեքը կկազմի 15 մլն դոլար: Այս մասին երեկ լրագրողների հետ հանդիպման ժամանակ հայտարարել է Հայաստանի Առևտրա-արդյունաբերական պալատի ներդրումային հանձնաժողովի ղեկավար, «Սյունիք» Ազատ տնտեսական գոտու Խորհրդի նախագահ Սարգիս Աղաբեկյանը:
Նրա խոսքով, ծրագիրը վերջերս է ներկայացվել կառավարության հավանությանը: Նա նշել է, որ, ըստ բիզնես-պլանի, ԱՏԳ հիմնականում կունենա արդյունաբերական ուղղվածություն, չնայած, կարող է ունենալ նաև էներգետիկ բաղադրիչ, կապված նավթաքիմիայի նախագծերի զարգացման հետ: Միջոցները նախատեսվում են ներդնել համապատասխան ենթակառուցվածքներում: «Ես վստահ եմ, որ իրական ներդրումները կգերազանցեն 15 մլն դոլարը»,-ասել է Աղաբեկյանը:Նա նշել է, որ ԱՏԳ ստեղծվում է հարևան երկրների, մասնավորապես, Իրանի հետ համագործակցությունն ակտիվացնելու նպատակով: Այդ հարթակը կարելի է օգտագործել նաև Եվրասիական տնտեսական միության շրջանակներում համագործակցությունը զարգացնելու համար: Նախագծի հիմնադիրն է Հայաստանի Առևտրա-արդյունաբերական պալատը: Ծրագիրն այսօր Երևանում ներկայացվել է Աբու Դաբիի Առևտրա-արդյունաբերական պալատի ներկայացուցիչների հետ գործարար հանդիպմանը:
