Անահիտ Բաղդասարյան
Նախկինում Խոտ գյուղն իսկապես տարածաշրջանի հարուստ տնտեսություններից մեկն էր, մանավանդ գյուղի տարածքում կառուցված Գորիսի օդանավակայանի հետ մարդիկ մեծ հույսեր էին կապում, որ տնտեսությունն էլ ավելի կզարգանա: Առանձնահատուկ ուշադրություն էր դարձվում ենթակառուցվածքների ստեղծմանը, որոնցից ամենակարեւորը ճանապարհների բարեկարգումն էր: Վերջինս, սակայն այսօր Խոտի ամենակարեւոր խնդիրն է համարվում: Գյուղից դեպի Տաթեւ տանող գլխավոր մայրուղի ընկած 2 կմ երկարությամբ ճանապարհը պետք է բարեկարգվի, ասֆալտապատվի: Միջհամայնքային ճանապարհից բացի, Խոտի համար կենսական նշանակություն ունի նաեւ խմելու ջրի կարգավորիչ ջրամբարի կառուցումը: ՞Չնայած որ խմելու ջրի վարձավճարները գանձում է «Հայջրմուղկոյուղի» ընկերությունը, սակայն ջրամատակարարման ներքին ցանցը պատկանում է համայնքին եւ սեփական միջոցներով պետք է իրականացվեն կարգավորման, վերանորոգման բոլոր աշխատանքները: Համայնքի ղեկավար Մարտիրոս Գրիգորյանի խոսքով՝ այդ խնդիրները կլուծվեն պահուստայի ֆոնդի գումարներով:
Պահուստային ֆոնդի բյուջեն տարեսկզբին կազմել է 17 մլն, բայց հետո ավելացել և դարձել է 120 մլն, որը գոյացել է «Տաթև» ՀԷԿի նախկինում վարձակալած , այժմ արդեն սեփականաշնորհած 29 հա հողատարածքից: Եվս 12,8 մլն դրամի եկամուտ ապահովվել է հողի օտարումից: Շվեյցարական զարգացման գործակալությունը համայնքի տարածքում անասնապահական եւ գյուղատնտեսական պարագաների ցուցադրության եւ վաճառքի համալիր է կառուցում, որը շահագորման կհանձնվի հոկտեմբերին:
