Քրիստինե Հայրապետյան
Դեկտեմբերի 17-ին Վաղարշ Վաղարշյանի անվան պետկան դրամատիկական թատրոնի դահլիճում տեղի ունեցավ Գորիսի Գուսան Աշոտի անվան մշակույթի կենտրոնի տարեվերջյան տոնական հաշվետու համերգը:
2014 թ. ընթացքում մշակույթի տան նախաձեռնությամբ կազմակերպվել են տարբեր միջոցառումներ, այդ թվում համերգներ Սյունքի մարզում, զորմասերում, Քաշաթաղի շրջանում: Գ. Աշոտի մշակույթի տան կազմում են երկրագիտական թանգարանը, քաղաքային պատկերասրահը, գրադարանները, որոնք ևս տարբեր նախաձեռնություններ են իրականացրել: 
Ժողովրդական երաժշտական գործիքների համույթը գործել է դեռևս Խորհրդային տարիներին, սակայն Արցախյան պատերազմի տարիներին այն ցրվել ու որոշ ժամանակով դադարեցրել է իր գործունեությունը: 2001թ. կրկին սկսել է իր գործունեությունը, համալրվել նոր անդամներով, աստիճանաբար ընդլայնել համերգային ծրագրերը՝ հանդես գալով Հայաստանի տարբեր բնակավայրերում: Գորիսի զորամասերում ծառայող շնորհալի զինվորները ևս բազմիցս մասնակցել են Գուսան Աշոտի անվան մշակույթի կենտրոնի կողմից կազմակերպված միջոցառումներին:
Համերգի ընթացքում Գուսան Աշոտի անվան ժողովրդական գործիքների համույթի կատարմամբ հնչեցին ժողովրդական և գուսանական երգեր: Պարային կատարումներով հանդես եկան Վահե Մելքումյանի դպրոցի և Գ. Աշոտի անվան մշակույթի կենտրոնի պարուսույց Լուսինե Գրիգորյանի սաները:
