Սուսաննա Շահնազարյան
Այսօր ՀՀ տարածքային կառավարման և արտակարգ իրավիճակների նախարար Արմեն Երիցյանը աշխատանքային այցով եղավ Սյունիքի մարզի Հարժիս, Շինուհայր, Հալիձոր, Տաթև համայնքներում, նպատակ ունենալով համայնքների խոշորացման հանրաքվեից առաջ ծանոթանալ համայնքային խնդիրներին, լսել թիրախ համայնքների բնակիչների կարծիքները հանրաքվեի մասին: Հանդիպումների ընթացքում նախարարը հակիրճ ներկայացրեց խոշորացման ծրագիրը, անդրադարձավ խոշորացման առավելություններին: Հանդիպումների ընթացքում բնակիչները մտահոգություն հայտնեցին իրենց բնակավայրերի անվանումների փոփոխության, աշխատատեղերի կրճատման, ինչպես նաև համայնքային կենտրոնի չհավակնող համայնքի խնդիրների նկատմամբ հնարավոր անտարբերության մասին:
Պատասխանելով հարցերին, Արմեն Երիցյանը նշեց, որ խոշորացման արդյունքում միջազգային մի շարք կառույցներ լուրջ ներդրումներ կկատարեն մասնավորապես համայնքների ներհամայնքային ենթակառուցվածների բարեկարգման նպատակով, ինչպես նաև ավելի հասցեական կուղղվեն պետական բյուջեից համայնքներին ուղղվող ֆինանսական միջոցները:
Այցի ընթացքում ՏԿԱԻ նախարարին ուղեկցում էր Սյունիքի մարզպետ Սուրեն Խաչատրյանը:
ՀՀ կառավարությունը 2006թ. ծրագրել էր իրականացնել համայնքների խոշորացման ծրագիր: Այն նպատակ ունի խոշորացման ճանապարհով Հայաստանի համայնքների թիվը 915-ից հասցնել 300-ի: Կառավարության հիմնավորմամբ համայնքների խոշորացման արդյունքում հնարավոր կլինի հասնել ռեսուրսների արդյունավետ օգտագործման և կառավարման ապակենտրոնացման:
Կառավարությունը համայնքների խոշորացման և միջհամայնքային միավորումների ձևավորման հայեցակարգին հավանություն էր տվել 2011թ. նոյեմբերին: Տարածքային կառավարման նախարարությունը քննարկել էր համայնքների խոշորացման ծրագրերի երկու տարբերակ՝ ծրագրային և վարչական: Ծրագրային հիմնավորմամբ խոշորացման համար ընտրվել էր 14 համայնքային փունջ: Նպատակահարմար էր գտնվել իրականացնել համայնքների խոշորացման մի քանի պիլոտային ծրագիր՝ նախապես այդ համայնքում անցկացնելով տեղական հանրաքվե: ՀՀ կառավարության մարտի 19-ի նիստում որոշում է ընդունվել Սյունիքի մարզի Շինուհայրի, Տաթևի, Հալիձորի, Հարժիսի, Սվարանցի, Խոտի, Տանձատափի, Քաշունի համայնքներում մայիսի 17-ին անցկացվնել տեղական հանրաքվե համայնքների խոշորացման հարցով:
