Անահիտ Բաղդասարյան
Ապրիլի 23-ին Թուրքիայի Դիարբեքիր նահանգում կանադահայ Ռաֆֆի Պետրոսյանը կազմակրպել էր համերգ՝ նվիրված Ցեղասպանության զոհերի հիշատակին:
«Ինձ համար շատ կարևոր էր 100-ամյակին ընդառաջ գտնվել Տիգրանակերտում, որտեղ Ցեղասպանությունը ամենակատաղին է եղել»,-ասաց Պետրոսյանը: Պետրոսյանի խոսքով՝ սփյուքը անշուշտ իր դերակատարությունն ունի հայոց Ցեղասպանության ճանաչման հարցում, սակայն Հայաստանը պետք է երկխոսության մեջ մտնի հենց Թուրքիայի հետ՝ առանց 3-րդ երկրի միջամտության: «Մենք պետք է ոչ թե մյուս երկրերին համոզենք, որ ընդունեն Ցեղասպանությունը, այլ մեծ ջանք պիտի թափենք, որ հենց Թուրքիայի ժողովրդը հասկանա և ընդունի դա»,- նշում է Ռ. Պետրոսյանը:
«Տարիներ առաջ հնարավոր չէր նման միջոցառում կազմակերպել, սակայն հիմա մարդիկ ազատ կարող են արտահայտվել: Պետք է օգտագործել ստեղծված առիթը. նման միջոցառումները Թուրքիայում կազմակերպելը շատ կարևոր է, դրանք կնպաստեն ցեղասպանության ընդունմանը»,-նշեց Ռաֆֆի Պետրոսյանը: