Անահիտ Բաղդասարյան
Նոյեմբերի 13-ին Գորիսում տեղի ունեցավ «Համայնքի կողմից իրականացվող քաղաքաշինական ռազմավարություններ» COMUS ծրագրի շրջանակներում տեղական շահառուների խմբի անդրանիկ հանդիպում-քննարկումը:
Տեղական շահառուների խմբի (ՏՇԽ) ստեղծման գլխավոր նպատակներից մեկը քաղաքային վերականգնման միասնական մոտեցման ամրապնդումն է՝ ծրագիրն ավելի ստեղծագործ, հասցեական ու երկարաժամկետ կայունությամբ մշակելու ու զարգացնելու համար:ՏՇԽ-ի հիմնական նպատակն է պիլոտային քաղաքի ելակետային պլանը համատեղ թողարկելու, նախագծելու և եզրակացություններ անելու համար, որոնք կարող են հանգեցնել համապատասխան գործողությունների պլանավորմանն ու ժառանգության վերականգնման նախագծերի ընտրության կարևորմանը, ինչպես նաև ծրագրի շրջանակներում ապահովել հասարակության առավել լայն շրջանակների ներգրավվածությունն ու իրազեկությունը:
Հանդիպման սկզբում Եվրոպայի խորհրդի ներկայացուցիչ, COMUS Հայաստանի ծրագրի ղեկավար Սարհատ Պետրոսյանն ու Մշակույթի նախարարության մասնագետ, ծրագրի ազգային համակարգող Գոհար Գրիգորյանը ներկայացրին ծրագրի հիմնական նպատակները, վերջնական ակնկալվող արդյունքները և տեղական շահառուների խմբի դերակատարությունը ծրագրի իրականացման գործընթացում:
Քանի որ նաև փոփոխություններ են կատարվում Գորիս քաղաքի գլխավոր հատակագծում, հատակագծի հեղինակ Նունե Պետրոսյանը ներկայացրեց հատակագծի նախնական տարբերակը:
Հանդիպմանը մասնակցում էր նաև Գորիսի քաղաքապետ Վաչագան Ադունցը, ով կարևորեց Գորիսի հետագա զարգացման համար COMUS ծրագրի իրականացումն ու նման խմբի ստեղծումը:
Հանդիպման ներկաները խոսեցին Գորիս քաղաքում առկա քաղաքաշինության ռազմավարության մշակման ոլորտում առկա խնդիրների , դրանց լուծման համար եղած խոչընդոտների, ինչպես նաև հետագա քայլերի վերավերյալ:
Հիշեցնենք, որ Եվրոպայի խորհրդի և Եվրամիության համատեղ COMUS ծրագիրն իրականացվում է 5 երկրներում (Ադրբեջանը հրաժարվել է) ՝ Հայաստանում, Վրաստանում , Ուկրաինայում , Բելառուսում , Մոլդովայում: Յուրաքանչյուր երկրից ընտրվել են պիլոտային քաղաքներ նախագծին մասնակցելու համար: Հայաստանում ընտրված պիլոտային քաղաքներն են Գորիսն ու Գյումրին:
Ծրագրի հիմնական նպատակն է խթանել սոցիալական և տնտեսական զարգացումը՝ ուժեղացնելով մշակութային ժառանգության ռեսուրսները պատմական քաղաքներում: Նախագիծը ներառում է ժառանգության պահպանության և կառավարման ավելի լավ ինտեգրում քաղաքային (և տարածաշրջանային) տնտեսական զարգացման քաղաքականություններին՝ միաժամանակ ուղղորդելով պլանավորման, զբոսաշրջության, շրջակա միջավայրի, սոցիալական և այլ քաղաքականությունների ոլորտների միջև փոխազդեցությունը:
