Բելլա Պետրոսյան
Զարմանալի է, բայց Գորիսում մեծ թիվ են կազմում այն մարդիկ, ովքեր տեղյակ չեն համայնքների խոշորացման մասին, այն էլ այն ժամանակ, երբ վաղը համայնքում ՏԻՄ ընտրություններն են: Իսկ այն մարդիկ էլ, ովքեր լսել են, կարդացել են, թերահավատորեն են մոտենում հարցին: Ոմանք նշում են, որ խոշորացումը բացասական ազդեցություն կունենա բոլոր համայնքների վրա:
Մարդկանց մի ստվար զանգվածի համոզմամբ էլ, սա ընդամենը համայնքներին հատկացվող գումարների խնայողության համար է:
«Հարյուր նախարար, խորհրդատու են պահում, ամեն մեկին միլիոններ վճարում, բայց խնայողություն անելու համար էլի մեզ՝ բնակչիներիս են հիշում»,-նշում է տարեց թոշակառուն, ով չցանկացավ իր անունը նշել:«Առանձին համայնքների խնդիրներին այսօր էլ պատշաճ լուծում չի տրվում, ուր մնաց խոշորացումից հետո, երբ այդքան համայքներ միավորվեն»,-ասում է Սուրեն պապը:
Բնակիչները նշում են, որ համայնքում ավելի կարևոր, առաջնային խնդիրներ կան, որոնք ավելի վաղ լուծման կարիք ունեն:
Տարիներ շարունակ քառամյա զարգացման ծրագրերում կարևորվում է քաղաքի ասֆալտապատման հարցը, մասնավորպես 2013-2016թթ. զարգացման ծրագրում նշվում է, որ 100 մլն. դրամ է նախատեվում միայն բակերի բարեկարգման համար, 30 մլն.՝ քաղաքի կենտրոնական փողոցների մայթերի բարեկարգման համար: Բայց արի ու տես, որ բակերի մեծ մասը գտնվում է, մեղմ ասած, անբարեկարգ վիճակում:
Թվում է, թե քաղաքի ջրամատակարարման խնդիրը լուծված է: Ծայրամասային Նոր-կյանք, Սարգսյան փողոցների ջրմատակարարման գրաֆիկը ամռան ամիսներին շատ անկանոն է: Ցերեկը ջուր ստանում են ընդամենը մի քանի ժամով: Նշված խնդիրները խոշորացմումից լուծելու հեռանկարը շատերի համար իրատեսական չէ:
