Անահիտ Բաղդասարյան
Համայնքների խոշորացման արդյունքում Սյունիքի մարզի նախկին Ծղուկ, Սառնակունք, Սպանդարյան, Գորայք համայնքներից ձևավորվել է Գորայք համայնք, որտեղ 2016թ. սեպտեմբերի 18-ին տեղի ունեցած ընտրությունների արդյունքում համայնքի ղեկավար է ընտրվել Առուստամ Առուստամյանը:
Մինչ խոշորացումը, բազմաբնակավայր համայնքի մաս կազմող Ծղուկի, Սառնակունքի, Սպանդարյանի, Գորայքի համայնքապետարանների աշխատակազմում ընդգրկված էր 44 հոգի, այժմ` 24: Ներկայումս բնակավայրերից յուրաքանչյուրում պահպանվել է 3 հաստիք՝ համայնքի ղեկավարի վարչական ներկայացուցիչ, օպերատոր և օժանդակ բանվոր:
Մեզ հատկապես հետաքրքրում է, թե ինչու են կրճատվել բնակավայրերի ակումբավարները. համայնքի ղեկավար Առուստամ Առուստամյանի խոսքով՝ տարիներ շարունակ այդ բնակավայրերում մշակութային կյանքի աշխուժացման ուղղությամբ որևէ աշխատանք չի կատարվել. «Նախ մշակույթի տների շենքերն գտնվում են անմխիթար վիճակում, իսկ աշխատակիցները , թոշակառուի նման փող էին ստանում և ոչինչ չէին անում»:
Ինչ վերաբերում է առհասարակ, կադրային քաղաքականությանը, ապա համայնքի ղեկավարը նշում է, որ վարչական կենտրոնի աշխատակազմը համալվել է բնակավայրերի աշխատակազմի աշխատակիցներով, իսկ որոշ հաստիքներ, ինչպես օրինակ, իրավաբանը, սոցաշխատողը սիսիանաբնակներ են, արհեստավարժ, մասնագետներ:
«Հեշտ չէ մարդկանց աշխատանքից զրկելը, բայց եթե բոլորին պահեինք, համայնքային բյուջեն միայն աշխատավարձին կհերիքեր»,- ասում է համայնքի ղեկավարը:
1874 բնակիչ ունեցող Գորայք համայնքի տարեկան բյուջեն շուրջ 157 մլն է , որի մոտ 27% -ը կուղղվի աշխատավարձին:
Նախկին Գորայք համայնքը Սյունիքի մարզի ամենամեծ բյուջե ունեցող գյուղական համայնքներից էր՝ Ամուլ սարի վարձակալական գումարներից տարեկան համայնքի բյուջե է մուտքագրվում մոտ 120 միլիոն դրամ: Արդյոք այդ գումարները կուղղվեն նաև մյուս բնակավայրերի զարգացմանը, համայնքի ղեկավարը նշում է, որ Գորայքի համայնքային զարգացման ծրագիրը կազմելիս առավել ուշադրություն են դարձրել մյուս երեք բնակավայրերին: «Ուզում եմ մյուս համայնքները հասցնեմ նախկին Գորայք համայնքի մակարդակին, որպեսզի հետո բնակավայրերը համաչափ զարգացնենք»,- ասաց նա:
Համայնքի ղեկավարի խոսքով՝ այս տարի առաջնահերթ կլուծվի 3 բնակավայրերի լուսավորության հարցն ու բնակավայրեր տանող ճանապարհների սկզբնական հատվածի ասֆալտապատումը:
Թե արդյոք անհրաժեշտ էր խոշորացնել այս 4 նախկին համայնքները, թե ոչ, համայնքապետը դժվարացավ պատասխանել, քանի որ, ըստ նրա, ամեն ինչ նախնական փուլում է:
